ՏԵՍԱՆՅՈՒԹ. Հարվածել են Ռուսաստանի Սևծովյան նավատորմի կենտրոնակայանին, կա մեկ զոհ
Ուկրաինայի զինված ուժերը հրթիռային հարված են հասցրել Սևաստոպոլում գտնվող Ռուսաստանի Սևծովյան նավատորմի կենտրոնակայանի շենքին:
Մի բեկոր Սևաստոպոլում ընկել է Լունաչարսկու անվան ռուսական դրամատիկական թատրոնի մոտ:
«Թշնամին հրթիռային հարված է հասցրել նավատորմի շտաբին: Բոլոր օպերատիվ ծառայությունները մեկնել են տեղամաս: Զոհերի մասին տեղեկությունները ճշտվում են»,- Տելեգրամ-ալիքում գրել է Սևաստոպոլի նահանգապետ Միխայիլ Ռազվոժաևը:
Նրա փոխանցմամբ, հնարավոր է ևս մեկ հարձակում: Նա այդ կապակցությամբ բնակիչներին խնդրել է չմեկնել քաղաքի կենտրոն և դուրս չգալ տներից:
«Ով գտնվում է նավատորմի շտաբի մոտ, երբ հնչում է տագնապի ազդանշանը, գնացեք ապաստարաններ»,- նախազգուշացրել է Ռազվոզժաևը:
Հաղորդվում է, որ հրթիռակոծման վայր են մեկնել շտապօգնության մեծ թվով մեքենաներ: Պայթյունից սկսվել է հրդեհ, որը հիմա մարում են:
Ռուսաստանի պաշտպանության նախարարության Տելեգրամ-ալիքի փոխանցմամբ, հրթիռի հարվածից զոհվել է մեկ զինծառայող:
Սևծովյան նավատորմի շտաբը գտնվում է Սևաստոպոլի պատմական կենտրոնում, դրա հարևանությամբ գտնվում են մեծ թվով քաղաքացիական օբյեկտներ:
