ՏԵՍԱՆՅՈՒԹ. Զանգվածային հարձակում Ռուսաստանում. ՌԴ ՊՆ–ն խոցել է ընդհանուր 22 ԱԹՍ
Սեպտեմբերի 21-ի գիշերը ուկրաինական ավիացիոն տիպի անօդաչու թռչող սարքերը փորձել են գրոհել Ռուսաստանի չորս շրջաններ, պաշտպանության նախարարությունը հայտնել է 22 անօդաչու թռչող սարքի ոչնչացման մասին։
«ՀՕՊ համակարգերը Սև ծովի և Ղրիմի Հանրապետության տարածքում ոչնչացրել են 19 ուկրաինական անօդաչու թռչող սարքեր՝ մեկական Կուրսկի, Բելգորոդի և Օրյոլի շրջանների տարածքներում»,- ասվում է գերատեսչության հաղորդագրության մեջ։
Պաշտպանության նախարարությունը զոհերի և ավերածությունների մասին չի հաղորդում։ Ղրիմի ղեկավար Սերգեյ Ակսենովը նույնպես դեռևս չի մեկնաբանել հարձակման փորձը։
Ղրիմի ղեկավարի խորհրդական Օլեգ Կրյուչկովն իր թելեգրամյան ալիքում տեղի բնակիչներին կոչ է արել հեռանալ պատուհաններից՝ անօդաչու թռչող սարքի կամ հակաօդային պաշտպանության գործողության ձայնից հետո։ «Եթե գտնեք հակաօդային պաշտպանության կողմից խոցված կամ ռադիոէլեկտրոնային պատերազմի միջոցով վայրէջք կատարած անօդաչու թռչող սարքերի բեկորներ, խնդրում ենք դիմել հատուկ ծառայություններին կամ թեժ գծերին»,- գրել է նա։
Սևաստոպոլի նահանգապետ Միխայիլ Ռազվոժաևն իր հերթին հայտարարել է, որ քաղաքի մերձակայքում մի քանի անօդաչու թռչող սարքերի ոչնչացման մասին տեղեկությունները հավաստի չեն։ Նա հաստատել է հակաօդային պաշտպանության գործողությունը, սակայն «Ղրիմի գոտում»։
«Սևաստոպոլում բոլոր ծառայությունները պատրաստ են, օդային իրավիճակը վերահսկվում է»,- ասել է քաղաքի ղեկավարը։
Օրյոլի շրջանի նահանգապետ Անդրեյ Կլիչկովը հայտնել է, որ երկու անօդաչու թռչող սարքեր փորձել են գրոհել Օրյոլի շրջանի վառելիքաէներգետիկ համալիրի օբյեկտները, դրանք չեզոքացվել են։ Ըստ շրջանի ղեկավարի՝ նախնական տվյալներով զոհեր և ավերածություններ չկան։
