Ռուսաստանը պատրաստ է քննարկել Ուկրաինայի ժամանակավոր արտաքին վերահսկողության գաղափարը․ Գալուզին
Հատուկ ռազմական գործողության ավարտից հետո Ուկրաինայի արտաքին կառավարում ՄԱԿ-ի հովանու ներքո մտցնելու գաղափարը հակամարտության կարգավորման հնարավոր տարբերակներից մեկն է, և Ռուսաստանը պատրաստ է այն քննարկել այլ երկրների հետ։ Այս մասին ՏԱՍՍ-ին տված հարցազրույցում հայտարարել է Ռուսաստանի փոխարտգործնախարար Միխայիլ Գալուզինը։
«2025 թվականի մարտին Ռուսաստանի նախագահ Վլադիմիր Պուտինը հայտարարել է, որ Ուկրաինայի դեպքում ՄԱԿ-ի հովանու ներքո արտաքին կառավարման ստեղծումը հնարավոր տարբերակներից մեկն է։ Նմանատիպ նախադեպեր եղել են ՄԱԿ-ի խաղաղապահ գործունեության շրջանակներում։ Ընդհանուր առմամբ, Ռուսաստանը պատրաստ է ԱՄՆ-ի, եվրոպական երկրների և այլ երկրների հետ քննարկել Կիևում ժամանակավոր արտաքին կառավարում մտցնելու հնարավորությունը»։
Փոխարտգործնախարարը կարծում է, որ նման քայլը «հնարավորություն կտա Ուկրաինայում անցկացնել ժողովրդավարական ընտրություններ և ստեղծել կենսունակ կառավարություն, որի հետ կարող են ստորագրվել լիարժեք խաղաղության պայմանագիր և օրինական փաստաթղթեր միջպետական համագործակցության ապագայի վերաբերյալ»։
«Միևնույն ժամանակ պետք է հաշվի առնել, որ ՄԱԿ-ը պաշտոնապես չի ստեղծել միատեսակ մեխանիզմ՝ հակամարտությունից տուժած տարածքներում ժամանակավոր միջազգային վարչակազմեր ստեղծելու համար»,- նշել է նա։
