«Հայաստանը ձգտում է հնարավորինս շուտ ստորագրել խաղաղության համաձայնագիրը». Խաչատուրյան

ՀՀ նախագահ Վահագն Խաչատուրյանը հայտարարել է, թե Ադրբեջանի հետ խաղաղության պայմանագրի շուրջ հիմնական տարաձայնությունները վերաբերում են ԼՂ-ին։

«Եկեք շատ մանրամասներ չբացենք, որովհետև իրականում շատ դեպքերում մեր տարբեր հայտարարություններ և մեկնաբանություններ հօգուտ չեն լինում, որովհետև հակառակորդ կողմն անընդհատ հղում է անում ՀՀ տարբեր պաշտոնյաների տարբեր մեկնաբանությունների»,- ասել է նա։ 

Ըստ Խաչատուրյանի, Հայաստանը ձգտում է հնարավորինս շուտ ստորագրել խաղաղության համաձայնագիրը։

«Որպեսզի անընդհատ, հերթական անորոշ իրավիճակում չհայտնվենք, թե սահմանին կարող է զորքեր կուտակվեն, կարող է՝ չկուտակվեն, այլ ունենանք վստահելի միջավայր, որտեղ վաղվա հետ կապված, սահմանների անձեռնմխելիության, մեր ինքնիշխանության կորստի հետ կապված խնդիրներ չունենանք»,- ասել է նա։

Վահագն Խաչատուրյանը նաև նշել է, թե ինքը պարբերաբար տեղեկացվում է բանակցային մանրամասների մասին։