Ջո Բայդենի որդուն մեղադրանք է առաջադրվել. նրան սպառնում է մինչև 25 տարվա ազատազրկում

ԱՄՆ նախագահ Ջո Բայդենի որդուն՝ Հանթեր Բայդենին մեղադրանք է առաջադրվել թմրադեղեր օգտագործելու ժամանակ ապօրինի զենք ձեռք բերելու և պահելու մեջ, հայտնում է CNN-ը։ 

Հեռուստաալիքի տվյալներով՝ մեղադրական երկու կետ կապված է այն բանի հետ, որ 2018 թվականին ԱՄՆ նախագահի որդին ատրճանակ գնելիս ստել է թմրանյութ չօգտագործելու մասին։ Երրորդ հոդվածում ասվում է, որ Հանթեր Բայդենը թմրանյութ օգտագործելիս հրազեն է ունեցել: CNN-ը պարզաբանում է, որ երկուսն էլ դաշնային հանցագործություններ են։ 

The New York Times-ը գրում է, որ եթե Հանթեր Բայդենին մեղավոր ճանաչեն, նրան սպառնում է մինչև 25 տարվա ազատազրկում և 750 հազար դոլար տուգանք։ 

Հանթեր Բայդենի նկատմամբ հետաքննությունը սկսվել է 2018թ.ին: 2023–ի ամռանը նախագահի որդին գործարքի մեջ է մտել ԱՄՆ արդարադատության նախարարության հետ, որի համաձայն նա պետք է իրեն մեղավոր ճանաչեր 2017-2018 թվականներին կատարված երկու հարկային իրավախախտումների մեջ։ Փոխարենը Հանթերի դեմ ապօրինի զենք պահելու մեղադրանքը պետք է հանվեր երկու տարուց։ Սակայն գործարքը հուլիսի 26-ին չհաստատվեց դատարանի կողմից, և գործով հատուկ դատախազ Դեյվիդ Վայսն ավելի ուշ ասաց, որ այս հարցի շուրջ բանակցությունները փակուղի են մտել և դադարեցվել։