Արարատ Միրզոյանին ՔՊ-ականները այլևս առաջվա պես չեն վերաբերվում. «Ժողովուրդ»

Երեկ հայրենի գործադիրը, Նիկոլ Փաշինյանի գլխավորությամբ, եկել էր խորհրդարան՝ պատգամավորների հարցերին պատասխանելու: «Ժողովուրդ» օրաթերթը գրում է, որ  ՔՊ-ականները Փաշինյանին ու բոլոր նախարարներին, բացի արտգործնախարար Արարատ Միրզոյանից, շատ ջերմ ընդունել են, հատուկ դիմավորել են նրանց, մինչև նիստի սկսելը առանձին զրույցներ ունեցել նախարարների հետ: Միրզոյանը, սակայն, ԱԺ եկել է նիստը սկսվելուց քիչ առաջ ու ավարտվելուն պես հեռացել:

ՔՊ-ականները առանձնապես չեն էլ շփվել նրա հետ, անգամ թիմում նրա մտերիմներն այլևս առաջվա ջերմությամբ չեն շփվում նրա հետ: Արարատ Միրզոյանն էլ իր հերթին շատ սառն է եղել թիմակիցների հետ, չի շփվել նրանց հետ։ Ըստ օրաթերթի՝ 44-օրյա պատերազմից հետո, մասնավորապես՝ նոյեմբերի 9-ի ուշ գիշերը՝ կառավարության շենքում տեղի ունեցած ծեծից հետո, Արարատ Միրզոյանի ու Նիկոլ Փաշինյանի հարաբերությունները ծայրահեղ լարվել են՝ չնայած նրան, որ մինչ այդ Միրզոյանը Փաշինյանի համար եղել է ամենավստահելի մարդը ՔՊ-ում: