Հաջիևը պատասխանել է Մենենդեսի՝ Արցախի շրջափակման մասին հայտարարությանը

Ադրբեջանի նախագահի օգնական Հիքմեթ Հաջիևը պատասխանել է ամերիկացի սենատոր, Սենատի արտաքին հարաբերությունների հանձնաժողովի նախագահ Բոբ Մենենդեսին:  

«Կոռուպցիայի լուրջ մեղադրանքներին պատասխանելու փոխարեն, կոնգրեսական Մենենդեսը ստում է Սենատի արտաքին հարաբերությունների հանձնաժողովին՝ կեղծ տեղեկատվությամբ և կեղծ լուսանկարով: Լուսանկարում պատկերված անձը մահացել է քաղցկեղից։ Հայերն իրենք ամաչում են օգտագործել այդ անթաքույց սուտը բժշկական ապացույցներ ներկայացնելուց հետո։ Նման լոբբիզմը, «փողը խոսում է» մոտեցումը, բացահայտ սուտը և ռասիստական ատելությունը ադրբեջանցիների նկատմամբ վնասում են ԱՄՆ Կոնգրեսի իմիջին և գլոբալ հեղինակությանը», - նշել է Հիքմեթ Հաջիևը։ 

Հիշեցնենք, որ Մենենդեսը երեկ Սենատի նիստում նախազգուշացրել է, որ Ադրբեջանի կողմից Արցախի շրջափակումն ունի ցեղասպանության բոլոր նշանները։ Նա ներկայացրել է Արցախում սովամահության առաջին զոհի լուսանկարները և շեշտել՝ Ադրբեջանի վարչակարգը ցեղասպանություն է իրականացնում Լեռնային Ղարաբաղի հայերի դեմ։