Չինաստանի և Հնդկաստանի «թույլ մտավոր ներուժի» մասին արտահայտությունը հանվել է կոնտեքստից․ Պոդոլյակ
Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը սոցցանցերում հայտարարել է, որ Չինաստանի և Հնդկաստանի «թույլ մտավոր ներուժի» մասին իր արտահայտությունը հանել են կոնտեքստից:
Նրա կարծիքով՝ «ռուսական պրոպագանդան» աղավաղել է իր արտահայտության իմաստը։
Ավելի վաղ հայտնել էինք, որ Պոդոլյակի խոսքերին արձագանքել էր Չինաստանի ԱԳՆ-ն։ Մաո Նինը պարզաբանումներ է պահանջել։ Նա նաև ընդգծել է, որ Չինաստանը միշտ պատասխանատու դիրքորոշում ունի ուկրաինական հարցի վերաբերյալ, կոչ է արել զինադադար հաստատել հակամարտության մասնակիցների միջև և առաջ է քաշել ճգնաժամի քաղաքական կարգավորման գաղափարը:
Հիշեցնենք՝ Միխայիլ Պոդոլյակը հայտարարել է, որ Հնդկաստանն ու Չինաստանը «թույլ մտավոր ներուժ» ունեն: Այդ երկրները չեն վերլուծում սեփական քայլերի հետևանքները, բայց միևնույն ժամանակ արդյունավետ գումար են վաստակում Ուկրաինական հակամարտությունից։
