Զելենսկին կմասնակցի Ուկրաինայի հարցով ՄԱԿ-ի Անվտանգության խորհրդի նիստին
Վլադիմիր Զելենսկին Նյու Յորքում կմասնակցի ՄԱԿ-ի համաշխարհային առաջնորդների հանդիպմանը, ինչպես նաև Ուկրաինայի հարցով Անվտանգության խորհրդի նիստին, որը նախատեսված է սեպտեմբերի 20-ին, լրագրողներին ասել է ՄԱԿ-ում Ալբանիայի դեսպան Ֆերիտ Հոջան, գրում է Guardian-ը։
«Սպասվում է, որ Վլադիմիր Զելենսկին այս ամիս Նյու Յորքում կմասնակցի ՄԱԿ-ում համաշխարհային առաջնորդների տարեկան հանդիպմանը, ինչպես նաև կմասնակցի Ուկրաինայի հարցով ՄԱԿ-ի Անվտանգության խորհրդի նիստին», - ասել է Հոջան։
Ավելի վաղ Ալբանիայի մշտական ներկայացուցիչը մամուլի ասուլիսի ժամանակ հայտնել էր, որ սեպտեմբերի 20-ին Ուկրաինայի հարցով ՄԱԿ-ի Անվտանգության խորհրդի նիստը կանցկացվի պատվիրակությունների ղեկավարների մակարդակով։
Թեման նվիրված է լինելու «Ուկրաինայում խաղաղության և անվտանգության պահպանմանը», ասվում է Անվտանգության խորհրդի սեպտեմբերյան միջոցառումների ծրագրում։
Սեպտեմբերի 19-ից 26-ը կայանալիք ՄԱԿ-ի Գլխավոր ասամբլեայի նստաշրջանի բարձր մակարդակի շաբաթվա միջոցառումներին ակնկալվում է 99 պետությունների ղեկավարների, 48 վարչապետների և 32 արտգործնախարարների մասնակցություն։
Ռուսական պատվիրակությունը կգլխավորի ՌԴ ԱԳ նախարար Սերգեյ Լավրովը։ Նրա ելույթը նախատեսված է սեպտեմբերի 23-ին։ Ակնկալվում է, որ ի թիվս այլոց, բարձր մակարդակի շաբաթվան կմասնակցի նաև ԱՄՆ նախագահ Ջո Բայդենը։
