Նիգերում Ֆրանսիայի դեսպանին զրկել են դիվանագիտական անձեռնմխելիությունից
Նիգերում Ֆրանսիայի դեսպանն այլեւս դիվանագիտական անձեռնմխելիություն չունի. Այս մասին հայտնում է Sky News Arabia-ն։
Հեռուստաալիքի տվյալներով՝ տեղի ոստիկանությանը հանձնարարվել է միջոցներ ձեռնարկել երկրից ֆրանսիացի դիվանագետին արտաքսելու համար։
Մինչ այս հաղորդվում էր, որ Նիգերում հեղաշրջում իրականացրած զինվորականները պահանջել են ֆրանսիական բոլոր զորքերը դուրս բերել երկրից մինչև սեպտեմբերի 3-ը։
«Հայրենիքի պաշտպանության ազգային խորհրդի» ներկայացուցիչն ասել է, որ Նիգերից ֆրանսիական զորքերի դուրսբերման համար հատկացված 30-օրյա ժամկետը լրանում է սեպտեմբերի 3-ին, և ֆրանսիացի զինվորները պետք է ամբողջությամբ լքեն երկիրը մինչև այդ ամսաթիվը։ Հեռուստաալիքին հասած տեղեկատվության համաձայն՝ նոր կառավարության կողմնակիցները պատրաստվում են անժամկետ բողոքի ցույց կազմակերպել Նիգերում ֆրանսիական զորքերի ներկայության դեմ մինչև շաբաթվա վերջ։
