Սուրեն Պապիկյանը պատրաստ է հանդիպել «Քիմիկների զորամասի» անհետ կորած զինծառայողների ծնողների հետ․ ՊՆ խոսնակ

ՀՀ ՊՆ նախարարի տեղակալ Արման Սարգսյանը ծնողներին փոխանցել է պաշտպանության նախարարի պատրաստակամությունը՝ առաջիկայում հանդիպում ունենալ նրանց հետ, Armenia Today-ին հայտնել է ՊՆ մամուլի խոսնակ Արամ Թորոսյանը՝ մեկնաբանելով Էջմիածնի «Քիմիկների զորամասի» անհետ կորած զինծառայողների ծնողների ՊՆ շենք մտնելն ու նախարար Սուրեն Պապիկյանի հետ հանիդպում պահանջելը։ 

«Ծնողները հանդիպել են ՊՆ նախարարի տեղակալ Արման Սարգսյանի հետ, այժմ ընթացքի մեջ է ԲՀԱ (Բարոյահոգեբանական ապահովում) վարչության պետի հետ հանդիպումը։ Պաշտպանության նախարարի տեղակալը ծնողներին հայտնել է պաշտպանության նախարարի պատրաստակամությունը՝ առաջիկայում հանդիպումներ ունենալ ծնողների հետ»,- ասել է Թորոսյանը։

Ավելի վաղ հայտնել էինք, որ Էջմիածնի «Քիմիկների» զորամասից 44-օրյա պատերազմ մեկնած և մինչ օրս անհետ կորած համարվող զինծառայողների ծնողները կգիշերեն պաշտպանության նախարարությունում։

Հավելենք, որ ծնողները պարբերաբար բողոքի ակցիաներ են իրականացնում և պահանջում բարձրաստիճան պաշտոնյաների հետ հանդիպում։