Իտալիան դադարեցնում է «ոսկե վիզաներ» տրամադրել ՌԴ և Բելառուսի քաղաքացիներին

Իտալիան ժամանակավորապես դադարեցնում է ներդրումների դիմաց Ռուսաստանի Դաշնության և Բելառուսի քաղաքացիներին, այսպես կոչված, «ոսկե վիզաների» տրամադրման ծրագիրը։ Այս մասին երեքշաբթի՝ օգոստոսի 8-ին, հայտնել է իտալական Affari Italiani թերթը։ Պարբերականի տվյալներով,  այս կապակցությամբ Եվրահանձնաժողովի հանձնարարականը տրվել է 2022 թվականի մարտի վերջին։ Մինչդեռ կասեցման մասին  Իտալիայի կառավարության հրամանը եղել է միայն 2023 թվականի հուլիսի կեսերին։ Անցյալ տարի, ըստ հրապարակման, Իտալիան հասցրել  է «ներդրողի» երկամյա վիզա տրամադրել Ռուսաստանի Դաշնության 36 քաղաքացիներից առնվազն 32-ին։ 

Բաց աղբյուրներից ստացված տեղեկատվության համաձայն,«ներդրողի» վիզան տրվում էր երկու տարով՝ ևս երեքով երկարաձգելու հնարավորությամբ՝ ներդրումների շարունակման պայմանով, այն ստանալուց հինգ տարի անց կարելի էր հավակնել մշտական ​​բնակության թույլտվություն, իսկ ևս հինգ տարուց՝ Իտալիայի քաղաքացիություն ստանալուն, գրում է DW-ն։ 


Ըստ Affari Italiani-ի, 2022 թվականին նման վիզաներ ամենաշատը ստացել են ռուսաստանցիները՝ առաջ անցնելով ԱՄՆ-ի (12), Մեծ Բրիտանիայի (12)  քաղաքացիներից և ԵՄ անդամ չհանդիսացող երկրներից  23 դիմողներից։ Հրապարակման համաձայն, անցած տարին «ոսկե վիզաների» տրամադրման գագաթնակետն էր 2017 թվականին Իտալիայի իրավական համակարգում դրանց ներդրման պահից. տրամադրվել է 79-ը  (92 հայցողից) և ներգրավվել 32,3 միլիոն եվրո։ 

Եվրահանձնաժողովը մտավախություն ունի, որ նման մեխանիզմը կարող է Եվրամիություն և Շենգենյան գոտի «արտոնյալ մուտք» ապահովել Ռուսաստանի կամ Բելառուսի քաղաքացիների համար, ովքեր գտնվում են պատժամիջոցների տակ կամ կհայտնվեն դրանց տակ՝ Ուկրաինայում ռուսաստանյան պատերազմի ֆոնին: Բրյուսելում, անվտանգության համարժեք ստուգումների դժվարության պատճառով, ԵՄ երկրներին, այդ թվում՝ Իտալիային, առաջարկվել է անհապաղ դադարեցնել այդ ծրագրերը ռուսների և բելառուսների համար՝ «առանց վնասելու» այն քաղաքացիներին, ովքեր ցանկանում են մուտք գործել ԵՄ «մարդասիրական կամ միջազգային պաշտպանության նկատառումներով»: