Լոնդոնի ոստիկանությունը կասկածելի չի համարում Շինեյդ Օ'Քոնորի մահը

Իռլանդացի երգչուհի Շինեյդ Օ'Քոնորը մահացել է Լոնդոնի իր տանը, ոստիկանությունը նրա մահը կասկածելի չի համարում, գրում է Guardian-ը՝ վկայակոչելով Սքոթլանդ Յարդի հայտարարությունը։ 

Երգչուհու մարմինը հայտնաբերվել է հուլիսի 26-ին, ժամը 11:18-ի սահմաններում: Ոստիկանությունը հայտնել է, որ նա արդեն մահացած է եղել: Մահվան պատճառը կհաստատվի քննությամբ, ուսումնասիրությունը կարող է տևել մի քանի շաբաթ, և արդյունքները կորոշեն՝ արդյոք անհրաժեշտ է դատաքննիչ, ասել է Լոնդոնի դատաբժշկական դատարաններից մեկը։ 

Հուլիսի 26-ի երեկոյան Օ'Քոննորի ընտանիքը հայտարարեց նրա մահվան մասին։ 

Երգչուհու մահվան մասին առաջինը գրել է Irish Times-ը՝ չնշելով ո՛չ վայրը, ո՛չ ամսաթիվը, ո՛չ էլ պատճառը։ 

The Guardian-ը հիշեցնում է, որ հուլիսի 9-ին երգչուհին Twitter-ում հոլովակ է հրապարակել՝ ասելով, որ գտնվում է Լոնդոնի իր տանը և ժամանել է այնտեղ՝ նոր երգեր ձայնագրելու։ Նա նաև հիշատակել է իր որդուն՝ Շեյնին, ով ինքնասպան է եղել 2022 թվականին 17 տարեկանում։ 

Շինեյդ Օ'Քոնորը 56 տարեկան էր։