Զելենսկուն փոխանցեք, որ դադարի Հունգարիային սպառնալ. Սիյարտո

Հունգարիան մերժում է Ուկրաինայի սպառնալիքները և «Դրուժբա» նավթատարի ենթակառուցվածքների վրա Ուկրաինայի զինված ուժերի հարվածները համարում է իր ինքնիշխանության դեմ հարձակում: Այս մասին հայտարարել է Հունգարիայի արտաքին գործերի նախարար Պետեր Սիյարտոն՝ մեկնաբանելով Վլադիմիր Զելենսկու վերջին հայտարարությունները, գրում է «Ռիա Նովոստի»-ն:

«Հունգարիան վճռականորեն մերժում է Ուկրաինայի նախագահի սպառնալիքները։ Մենք ինքնիշխանությունն ու տարածքային ամբողջականությունը համարում ենք միջազգային քաղաքականության հիմնական արժեքներ, հետևաբար հարգում ենք բոլոր երկրների ինքնիշխանությունն ու տարածքային ամբողջականությունը և նույնը ակնկալում ենք նրանցից: Պատերազմը, որում մենք անելիք չունենք, մեր ինքնիշխանությունը խախտելու օրինական պատճառ չէ։ Մենք կոչ ենք անում Վլադիմիր Զելենսկուն դադարեցնել Հունգարիային սպառնալը», - հավելել է նախարարը։

Հիշեցնենք՝ Ուկրաինայի զինված ուժերը մի քանի անօդաչու թռչող սարքերով և հրթիռներով հարվածներ են հասցրել Ռուսաստանի տարածքում գտնվող «Դրուժբա» նավթատարի ենթակառուցվածքներին: Հունգարիա և Սլովակիա նավթի մատակարարումները դադարեցվել են, քանի դեռ խողովակաշարը վերանորոգվում է: