Ղուրանի այրման դեպքից հետո Ալժիրի ԱԳՆ-ն կանչել է Դանիայի և Շվեդիայի դիվանագետներին
Ալժիրի արտաքին գործերի նախարարությունը հայտնել է, որ կանչել է Դանիայի դեսպանին և Շվեդիայի գործերի ժամանակավոր հավատարմատարին՝ բողոք հայտնելու այդ երկրներում Ղուրանի այրման դեմ։ Այս մասին հայտնում է РИА Новости-ն։
«Կոպենհագենում և Ստոկհոլմում Սուրբ Ղուրանի այրման հետ կապված միջադեպերից հետո Ալժիրի արտաքին գործերի նախարարությունը կանչել է Դանիայի դեսպանին, ինչպես նաև Շվեդիայի գործերի ժամանակավոր հավատարմատարին, որպեսզի նրանց տեղեկացնի Ալժիրի պաշտոնական բողոքի և այդ անբարոյական և հակադիվանագիտական գործողությունների խստիվ դատապարտման մասին»,- նշվում է հաղորդագրության մեջ:
Ալժիրի ԱԳՆ-ն նաև կոչ է արել Դանիայի և Շվեդիայի իշխանություններին միջոցներ ձեռնարկել ապագայում նման միջադեպերը կանխելու համար։
Մինչ այդ հայտնի է դարձել, որ Danske Patrioter («Դանիական հայրենասերներ») արմատական խմբավորման երկու անդամներ Դանիայի մայրաքաղաքում Իրաքի դեսպանատան դիմաց հրկիզել են Ղուրանը։ Կոպենհագենում ցույցի կազմակերպիչը ոտնահարել է Ղուրանը և այրել այն գետնին ընկած Իրաքի դրոշի կողքին գտնվող փայլաթիթեղե սկուտեղի վրա։
