«Իսկ ո՞վ է նա, որ պահանջում է». վարչապետի աշխատակազմից արձագանքել են Ռուբեն Վարդանյանին

Վարչապետի աշխատակազմի ղեկավարի տեղակալ Տարոն Չախոյանն արձագանքել է Արցախի նախկին պետնախարար, գործարար Ռուբեն Վարդանյանի հայտարարություններին՝ կապված ԼՂ-ում ստեղծված իրավիճակի հետ:

Ըստ Չախոյանի՝ Ռուբեն Վարդանյանը պահանջում է հստակեցնել ՀՀ և Արցախի հարաբերությունների կարգավիճակը՝ այդպիսով փորձելով սեպ խրել այդ հարաբերությունների ու ազգի մեջ։

«Հայաստանը «թաթարստանացման» փորձերը ձախողելուց հետո վերջինս ակնհայտ աշխատանքներ է տանում այդ ուղղությամբ Լեռնային Ղարաբաղից։

Պահանջում է նոր եռակողմ՝ Արցախի Հանրապետություն-Ռուսաստանի Դաշնություն-Ադրբեջանի Հանրապետություն համաձայնագրի ստորագրում։ Տրամաբանական հարց է ծագում, թե ումի՞ց է պահանջում՝ ՌԴ-ի՞ց, թե՞ Ադրբեջանից։ Ռուբեն Վարդանյանը խորը մոլորության մեջ է, եթե կարծում է, թե Ադրբեջանում քնում-արթնանում են նոր եռակողմ պայմանագիր կնքելու երազանքով։

Պահանջում է պաշտոնապես հայտարարել «Հայաքվե» նախաձեռնությանը ԼՂ իշխանությունների աջակցության մասին։ Սա ավելի քան հստակեցնում է Հայաստանը նոր պատերազմի մեջ ներքաշելուն միտված՝ «Հայաքվե» նախաձեռնության իրական տերերի պատկերը։

Ռուբեն Վարդանյանը նաև պահանջում է ՀՀ իշխանություններից պահանջել Հայաստանի ու Ադրբեջանի միջև վերջին հինգ տարիների բանակցային պատմության ողջ փաթեթը։ Վերջին 5 տարիների բանակցային ողջ պատմության մասին հստակ տեղեկացված է ԼՂ նախագահը՝ Արայիկ Հարությունյանը, իսկ ո՞վ է Ռուբեն Վարդանյանը, որ պահանջում է»,- գրել է նա:

Չախոյանը ուշագրավ է համարել նաև Վարդանյանի հայտարարությունն առ այն, թե Լեռնային Ղարաբաղը պետք է բանակցի ու գտնի այն դաշնակիցներին, որոնք կօգնեն այդ բանակցություններում։

«Ի դեպ, Հայաստանի Հանրապետությունը միշտ կողմ է արտահայտվել միջազգային մեխանիզմների ներքո Բաքու-Ստեփանակերտ երկխոսությանը։

Պետնախարարի պաշտոնում Ռուբեն Վարդանյանն ուներ բոլոր հնարավորությունները Ադրբեջանի հետ երկխոսելու, հարաբերություններ կարգավորելու համար, սակայն ոչ մի արդյունք չգրանցեց, իսկ պաշտոնից ազատվելուց հետո սկսեց թրեր ճոճել օդում»,- եզրափակել է նա:

Հիշեցնենք՝ ավելի վաղ հայտնել էինք, որ Արցախի Հանրապետության նախկին պետնախարար Ռուբեն Վարդանյանը ֆեյսբուքյան իր էջում գրառում է կատարել։