ԵՄ-ն 2024թ-ին չի ընդունի Թուրքիային. Պետեր Ստանո

Թուրքիան 2024 թվականին չի դառնա Եվրամիության անդամ։ Այս մասին Известия-ին հայտնել է ԵՄ արտաքին ծառայության պաշտոնական ներկայացուցիչ Պետեր Ստանոն։

Նրա խոսքով՝ «ԵՄ-ին անդամակցելու գործընթացը տարիներ է տևում, ոչ թե ժամեր»։ Նա հավելել է, որ ԵՄ-ն առայժմ պատրաստ չէ Թուրքիային նույնիսկ անայցագրային ռեժիմ տրամադրել:

«Այցագրային ռեժիմի ազատականացման որոշումը կայացվում է անդամ երկրների կողմից այն բանից հետո, երբ երկիրը բավարարում է բոլոր անհրաժեշտ չափանիշները, որոնք ներառում են մարդու իրավունքները և քաղաքական ազատությունները», - ասել է Ստանոն։

Հուլիսի 10-ին՝ ՆԱՏՕ-ի գագաթնաժողովի նախօրեին, Թուրքիայի նախագահ Ռեջեփ Թայիփ Էրդողանը հայտարարել էր, որ Անկարան կհաստատի Շվեդիայի անդամակցությունը դաշինքին այն բանից հետո, երբ կվերացվեն Եվրամիության ճանապարհին նրա պետության առջև ծառացած խոչընդոտները։ Դաշինքի գլխավոր քարտուղար Ենս Ստոլտենբերգն ավելի ուշ ասել էր, որ Ստոկհոլմը համաձայնել է աջակցել «ԵՄ-ին Թուրքիայի անդամակցության գործընթացը վերսկսելու ջանքերին, ներառյալ Մաքսային միության արդիականացումը և վիզային ռեժիմի ազատականացումը»։

Եվրահանձնաժողովն անմիջապես հայտարարել էր, որ Թուրքիայի կողմից ՆԱՏՕ-ին Շվեդիայի անդամակցության վավերացումը և ԵՄ-ին անդամակցելու ուղղությամբ երկրի առաջընթացը չեն կարող փոխկապակցվել: Դեռ մայիսի վերջին Եվրախորհրդարանի ամենամեծ խմբակցության՝ Եվրոպական ժողովրդական կուսակցության ղեկավար Մանֆրեդ Վեբերը հայտարարել էր, որ «ոչ ոք այլևս չի ցանկանում Թուրքիայի լիիրավ անդամակցությունը ԵՄ-ին»։