Մոսկվայի որոշման պատճառով ամբողջ աշխարհում հացահատիկի գները կարող են աճել․ Ջոն Քիրբի
Հացահատիկի գործարքից Ռուսաստանի դուրս գալուց հետո Ուկրաինայից գյուղատնտեսական արտադրանքի արտահանման «միակ տարբերակը» մնում է ցամաքային միջանցք։ Այս մասին ճեպազրույցում հայտարարել է ԱՄՆ Ազգային անվտանգության խորհրդի ներկայացուցիչ Ջոն Քիրբին։
Քիրբիի խոսքով՝ ցամաքային ճանապարհով ուկրաինական հացահատիկի արտահանումն քիչ արդյունավետ կլինի, քան ծովով, սակայն ԱՄՆ-ն չի դիտարկում բեռնանավերը ռազմանավերով ուղեկցելու տարբերակը։
«Միակ տարբերակը, որ կա՝ ցամաքով, երկաթուղով, բեռնատարով տեղափոխելն է։ Իհարկե, Ուկրաինայում այժմ ամեն ինչ տեղափոխվում է ցամաքային ճանապարհով։Դա ավելի դժվար է, պակաս արդյունավետ»,- ասել է Քիրբին։
Հաղորդվում է, որ Քիրբին գործարքի դադարեցման մեջ մեղադրել է Ռուսաստանին՝ նշելով՝ Մոսկվայի որոշման պատճառով ամբողջ աշխարհում հացահատիկի գները կարող են աճել։
Հիշեցնենք, որ երեկ՝ հուլիսի 17-ին, լրացավ հացահատիկի գործարքի ժամկետը․ ՌԴ-ն հայտարարեց, որ իրեն վերաբերող պարտավորությունները չեն կատարվել, ուստի դադարեցնում է Սևծովյան համաձայնագրերը, որոնք կնքվել էին Ստամբուլում։
