Rolls Royce-ը «սև ցուցակում» կներառի մեքենաները վերավաճառող գնորդներին

Բրիտանական Rolls Royce մեքենաշինական ընկերությունը հաճախորդներին, որոնք վերավաճառում են ապրանքանիշի նորագույն Spectre էլեկտրական մեքենան, կարգելի մեքենա գնել: Այս մասին գրում է Carscoops-ը։

Rolls Royce-ի գործադիր տնօրեն Տորստեն Մյուլեր Օթվոսն ասել է, որ գնորդները, որոնք վերավաճառում են Spectre-ն, այլևս չեն կարողանա գնել այդ մեքենայից: Հաճախորդները պետք է որակավորում ստանան էլեկտրական ավտոմեքենան գնելու համար և միայն դրանից հետո կարող են ստանալ իրենց պատվերի սլոթը:

«Ես ճիշտ չեմ համարում, որ ավտոարտադրողները հաճախորդներին, որոնք մոտ կես միլիոն դոլար են ծախսել մեքենայի վրա, ասում են, թե նրանք ինչ կարող են անել դրա հետ: Մարդկանց կյանքում հանգամանքները փոխվում են, նրանք կարող են ունենալ վաճառքի իրական պատճառներ, օրինակ՝ ֆինանսական խնդիրներ», - ասել է բրիտանացի ավտոդիլեր Թոմ Հարթլին:

Rolls Royce Spectre-ի առաջին մատակարարումները կսկսվեն 2023 թվականի չորրորդ եռամսյակում: Բայց արդեն այսօր որոշ գնորդներ ուռճացված գնով վաճառքի են հանում իրենց մեքենաները, որպեսզի ցանկացողներն առանց հերթի գնեն երկար սպասված էլեկտրամեքենան։