«Ռոսատոմը» գիտի` ինչպես կարելի է բեռնաթափել Երևանի փողոցները. մանրամասներ

«Ռոսատոմ» ընկերությունն առաջարկում է «Խելացի քաղաք» նախագծի միջոցով բեռնաթափել Երևանի փողոցները։ Այս պահին ընկերությունը բանակցում է քաղաքապետարանի ներկայացուցիչների հետ։ Այս մասին Sputnik Արմենիային հայտնել է Հայաստանում «Ռոսատոմ-Միջազգային ցանց» ներկայացուցչության տնօրեն Միխայիլ Տուրունդաևը։

Նախագիծն ավելի քան մեկ տարի առաջ ստորագրված համաձայնագրի` հայ–ռուսական հարաբերությունների զարգացման համալիր ծրագրի մի մասն է։

«Մենք աշխատում ենք Երևանի քաղաքապետարանի հետ։ Առավել մեծ հետաքրքրություն է առաջացրել Մոսկվայի օրինակով քաղաքային երթևեկության թվայնացումը», – ասել է Տուրունդաևը։

Նրա խոսքով` «Խելացի քաղաքը» նախատեսում է բազմաֆունկցիոնալ հարթակի ստեղծում, մեքենաների և հետիոտների շարժումները վերլուծող հատուկ տվիչներ ունեցող տեսախցիկներով քաղաքային հանգույցների թվայնացում։

Թվային հարթակը կարող է հետևել ցանկացած տրանսպորտային միջոցի, բացահայտել խախտումները, տուգանքներ հաշվեգրել։ Համակարգն ինքնավար է, ինքնուրույն է վերլուծում քաղաքի ծանրաբեռնվածությունը, առաջարկում է օպտիմալ երթուղիներ և լուծումներ։

«Համակարգը հաշվարկում է հետիոտների` փողոց անցնելու համար ծախսած ժամանակը, հետիոտների քանակը, վերլուծում է տրաֆիկը և օպտիմալ վայր առաջարկում հետիոտնային անցումների համար։ Ըստ էության, ոչ թե մարդն է որոշում, թե որտեղով անցնի հետիոտնը, այլ «խելացի» համակարգը», – ասել է Տուրունդաևը։

Նա նշել է, որ համակարգը թույլ է տալիս բեռնաթափել երթևեկությունը և օգնում է առավել օպտիմալ երթուղի գծել։

Տուրունդաևը նշեց, որ նախագիծը հետաքրքրել է Երևանի քաղաքապետարանի գործընկերներին։ Հայաստանում «Ռոսատոմ-Միջազգային ցանց» ներկայացուցչության տնօրենը հույս է հայտնել, որ նախագիծն առաջիկա մեկ կամ երկու տարում կյանքի կկոչվի։