Նոր մանրամասներ` Մադոննայի առողջական վիճակից

Երգչուհի Մադոննան հիվանդանոցից դուրս գրվելուց հետո շարունակել է թուլություն և հոգնածություն զգալ, հայտնում է TMZ-ը՝ հղում անելով իր աղբյուրներին։
 

Ըստ ինսայդերի՝ 64-ամյա երգչուհու ապաքինումն այնքան արագ չի ընթանում, որքան նա սպասում էր։

«Նա դեռ թույլ է և շատ հոգնած: Նա շատ ժամանակ է անցկացնում անկողնում», – կիսվել է աղբյուրը:

Նա նաև հավելել է, որ Մադոննան հույս ունի ժամանակին լիովին ապաքինվել իր «Տոնակատարությունների տարեդարձի» շրջագայության համար, որի առաջին համերգը նախատեսված էր հուլիսի 15-ին:

Հունիսի 24-ին Մադոննան գիտակցությունը կորցրել էր Նյու Յորքի իր բնակարանում, որից հետո նա հոսպիտալացվել էր սուր բակտերիալ վարակով։ Մի քանի օր անց հայտնին դուրս է գրվել հիվանդանոցից, սակայն նա շարունակում էր իրեն վատ զգալ։

Մադոննայի հարազատները պատմել են, որ նա չափազանց ինտենսիվ էր պատրաստվում շրջագայությանը՝ ի պատիվ իր կարիերայի 40-ամյակի, և այդ պատճառով նա խաթարել է իր առողջությունը։

Երգչուհու մենեջեր Գայ Օսիրին հայտնել է, որ նրա համերգները կվերածրագրեն։ Նա խոստացել է նոր ժամկետներ նշել ավելի ուշ։