ՌԴ դեսպանատունը խորհուրդ է տվել ժամանակավորապես Գերմանիա չներմուծել ռուսական համարներով մեքենաներ
Գերմանիայում Ռուսաստանի Դաշնության դեսպանությունն իր կայքում հորդորել է զերծ մնալ ռուսաստանյան համարանիշներով ավտոմեքենաներ երկիր ներկրելուց՝ առգրավման դեպքերի աճի պատճառով։ Այս մասին հայտնում է ria.ru-ն:
«Մինչև իրավիճակի պարզաբանումը (դեսպանատան և հյուպատոսական հիմնարկների կողմից ձեռնարկվել են համապատասխան քայլեր), մենք խստորեն խորհուրդ ենք տալիս Ռուսաստանի քաղաքացիներին ձեռնպահ մնալ Գերմանիա ռուսական համարներով մեքենաներ ներմուծելուց», - ասվում է Բեռլինում դեսպանատան մեկնաբանությունում։
Ավելի վաղ հաղորդվում էր, որ գերմանացի մաքսավորների կողմից ռուսական համարանիշներով ավտոմեքենաների առգրավման դեպքերը հաճախակիացել են։ Տուժածները մեղադրվում են Գերմանիայի Դաշնային Հանրապետության «Արտաքին առեւտրի մասին» պատժամիջոցների մասին օրենքը խախտելու մեջ։
«Հաշվի չեն առնվում այն փաստարկները, որ տվյալ դեպքում խոսքը գնում է ոչ թե վաճառքի համար նախատեսված ապրանքների, այլ անձնական նպատակների համար օգտագործվող և օրինական հիմքերով ժամանակավորապես Գերմանիա ներմուծված մասնավոր սեփականության մասին»,- նշում են դեսպանությունից։
Դիվանագիտական գերատեսչության տվյալներով՝ ՌԴ քաղաքացիներին զգուշացվում է նաև քրեական հետապնդման հնարավորության մասին՝ կապված գերմանական օրենսդրության խախտման հետ։
