Ինչու Իսրայելն Ուկրաինային «Երկաթե գմբեթ» համակարգ չի տալիս․ Նեթանյահուի պատասխանը

Իսրայելը «Երկաթե գմբեթ» հակաօդային պաշտպանության համակարգը կամ այլ զինատեսակներ չի տալիս Ուկրաինայի այն մտավախությունների պատճառով, որ դրանք կարող են հայտնվել Իրանի ձեռքում։ Այս մասին Wall Street Journal-ին տված հարցազրույցում ասել է Իսրայելի վարչապետ Բենիամին Նեթանյահուն։

«Կարծում եմ՝ կարևոր է հասկանալ, որ մենք մտահոգված ենք այն հնարավորությամբ, որ համակարգերը, որոնք մենք կտանք Ուկրաինային, կհայտնվեն Իրանի ձեռքում»,- ասել է նա։

Նեթանյահուն նշել է, որ եթե դա տեղի ունենա, Թեհրանը կկարողանա իսրայելական զենքն օգտագործել Իսրայելի դեմ։

Նա նշել է, որ Իսրայելը խիտ բնակեցված երկիր է, բայց մինչ այժմ կարողանում է խուսափել մեծ զոհերից, քանի որ «Երկաթե գմբեթ» համակարգը խոցում է Իսրայելի բնակչության կենտրոններին ուղղված հրթիռների 95%-ը։

«Այժմ, եթե այդ համակարգը հայտնվի Իրանի ձեռքում, ապա միլիոնավոր իսրայելցիներ կմնան անպաշտպան և վտանգի տակ»,- հավելել է նա։

«Երկաթե գմբեթ»-ը հակաօդային պաշտպանության համակարգ է, որը մշակվել է իսրայելական Rafael Advanced Defense Systems-ի կողմից՝ ԱՄՆ զենք արտադրող Raytheon-ի հետ համատեղ: Այն համարվում է փոքր հեռահարության հրթիռների դեմ ամենաարդյունավետ համակարգերից մեկը։

2022 թվականի հունիսի սկզբին Իսրայելում Ուկրաինայի դեսպան Եվգենի Կորնիյչուկն ասել էր, որ Ուկրաինան շահագրգռված է «Երկաթե գմբեթ» համակարգի ձեռքբերմամբ։