Հենց որ տապալվի Պուտինի ռեժիմը, ՀՀ-ի և Ադրբեջանի համար հաշտեցման հեռանկարներ կստեղծվեն

Հենց որ տապալվի Պուտինի ռեժիմը, Հարավային Կովկասում կստեղծվեն Ադրբեջանի և Հայաստանի հաշտեցման հեռանկարներ: Այս մասին իր թվիթերյան միկրոբլոգում գրել է Վրաստանի երրորդ նախագահ Միխեիլ Սաակաշվիլին, որը ներկայում անազատության մեջ է Վրաստանում: 

«Հենց որ տապալվի Պուտինի ռեժիմը, Վրաստանում իշխանությունն անմիջապես կփոխվի, իսկ Հարավային Կովկասում կստեղծվեն Ադրբեջանի և Հայաստանի հաշտեցման հեռանկարներ: Հետևաբար, մենք շատ շուտով կստանանք բոլորովին այլ, միացյալ Հարավային Կովկաս, և միևնույն ժամանակ (դրանով) մենք պետք է ուղիներ փնտրենք ամբողջ Կովկասը միավորելու՝ դեպի հաղթանակած Ուկրաինա և ողջ Եվրոպա մուտք գործելու հնարավորությամբ»,- գրել է Սաակաշվիլին: 

Սաակաշվիլին իր գրառման մեջ նշել է, որ Ռուսաստանում տեղի ունեցած վերջին զարգացումները (զինված ապսամբության փորձը) ցույց են տվել իշխանության «չափազանց թույլ» լինելը, ուստի, ըստ Սաակաշվիլիի, ակտիվանալու ժամանակն է:

«Վերականգնեք հները և ստեղծեք դիմադրության նոր բջիջներ, ակտիվացրեք ձեր կապերը սփյուռքի և, իհարկե, Ուկրաինայի միջոցով, եկեք միասին աշխատենք ժողովրդավարական աշխարհը պատրաստելու հյուսիսկովկասյան ժողովուրդների անկախությանը: Մենք պետք է կամուրջներ կառուցենք միմյանց հետ, որպեսզի (Ռուսաստանի) քայքայման գործընթացը հնարավորինս ոչ բռնի դառնա և ապագայում խուսափենք հակամարտություններից», - գրել է նա։