«Պրիգոժինը չի պատասխանել Պուտինի զանգերին». Լուկաշենկո

ռուսի նախագահ Ալեքսանդր Լուկաշենկոն բացահայտել է Ռուսաստանում «Վագներ» մասնավոր ռազմական ընկերության հիմնադիր Եվգենի Պրիգոժինի ապստամբության ժամանակ ՌԴ նախագահ Վլադիմիր Պուտինի հետ բանակցությունների մանրամասները։ 

Լուկաշենկոն նաև նշել է, որ համոզել է իր ռուս գործընկերոջը՝ չշտապել՝ կոշտ որոշումներ կայացնելու հարցում: Նրա խոսքով՝ ինքը Պուտինին առաջարկել է խոսել Պրիգոժինի հետ, սակայն նա պատասխանել է, որ դա անօգուտ է։ 

«Պրիգոժինը նույնիսկ հեռախոսը չի վերցնում, չի ուզում որևէ մեկի հետ խոսել»,- ՌԴ նախագահի խոսքերն է մեջբերել Լուկաշենկոն։

Բելառուսի ղեկավարի խոսքով՝ Պուտինի հետ զրույցում ինքը հասկացել է, որ Պրիգոժինի հարցում որոշում է կայացվել «դաժան լուծման գնալ»։

«Ես հասկացա, որ դաժան որոշում է կայացվել։ Ես Պուտինին առաջարկեցի չշտապել: Ասացի՝ արի խոսենք Պրիգոժինի հետ, նրա հրամանատարների հետ։ Ինչին ի պատասխան նա ասաց.«Լսի՛ր, Սաշա, դա անօգուտ է: Նա նույնիսկ հեռախոսը չի վերցնում, չի ուզում որևէ մեկի հետ խոսել»», - պատմել է Լուկաշենկոն:

Բելառուսի նախագահն ասել է, որ չնայած Պուտինի դիրքորոշմանը, ինքը պնդել է Պրիգոժինի հետ բանակցություններ վարելու հարցը։