Կանգառներում պետք է էկրաններ դնենք, որ մարդիկ իմանան՝ ավտոբուսը որտեղ է․ Ավինյան
«Կանգառներում էկրաններ պետք է դնենք, որ մարդիկ իմանան ավտոբուսը որտեղ է, քանի րոպեից կհասնի»։ Այս մասով այսօր՝ հունիսի 26-ին Երևանի քաղաքապետարանի գործակարգավարական նիստին հանձնարարական տվեց փոխքաղաքապետ Տիգրան Ավինյանը։
«Մեզ պետք է արդեն մտածել, որ կանգառներում համապատասխան էկրաններ լինեն, որպեսզի մարդիկ իմանան՝ ավտոբուսը որտեղ է և քանի րոպեից կանգառում կլինի»,- ասել է Ավինյանը։
Հիշեցնենք՝ փոխքաղաքապետ Ավինյանը ֆեյսբուքյան իր էջում գրել էր, որ Երևանի հասարակական տրանսպորտի մասին տեղեկատվությունը հասանելի է Yandex-ի էլեկտրոնային քարտեզում։ Նա գրել էր, որ այժմ կարող ենք օգտագործելով Yandex քարտեզները՝ տեսնել Երևանի հասարակական տրանսպորտի երթուղիները և կանգառները, պլանավորել երթևեկությունը՝ նշելով սկզբնակետը և վերջնակետը, կամ ընտրելով դրանք քարտեզի վրա, տեսնել պլանավորված երթուղու ուղեգիծը, հասկանալ՝ ինչպե՞ս հասնել մոտակա կանգառ, ո՞ր համարի տրանսպորտը նստել և ինչքա՞ն կտևի երթևեկությունը։
