ՀՀ-ի քաղաքացիները կկարողանան Վրաստան ճամփորդել նույնականացման քարտերով
ԱԺ արտաքին հարաբերությունների մշտական հանձնաժողովում քննարկվում է Հայաստանի և Վրաստանի միջև երկու պետությունների քաղաքացիների համար փոխադարձ առանց մուտքի արտոնագրի ճամփորդելու համաձայնագիրը վավերացնելու նախագիծը։
Վերջինիս նպատակն է հնարավորինս պարզեցնել երկու պետությունների տարածքներում քաղաքացիների փոխադարձ այցելությունները: Ըստ այդմ, Հայաստանի ու Վրաստանի քաղաքացիները կարող են փոխադարձ այցելություններ կատարել ոչ միայն անձնագրերով, այլև նույնականացման քարտերով։
ԱԳՆ փոխնախարար Վահան Կոստանյանը նշել է, որ այս նախագիծը բխում է կառավարության 2021-26թթ ծրագրից, համաձայն որի՝ Հայաստանը ցանկանում է ավելի խորացնել հարաբերությունները Վրաստանի հետ։
Նա հիշեցրել է, որ համաձայնագիրը կնքվել է 2023թ. հունվարի 12-ին.
«Վրացական կողմն արդեն ավարտել է ներպետական ընթացակարգերը։ Հայաստանում նախագիծն անցել է սահմանադրական վերահսկողություն և այժմ ներկայացվել է ԱԺ հաստատմանը»։
