Գյուղացին «կոտրած տաշտակի» առջև չի կանգնել. Իջևանի համայնքապետարան

Իջևանի համայնքապետարանը հաղորդագրություն է տարածել. 

«Համացանցում շրջանառվող տեղեկատվությունը, թե բերքի սպասող գյուղացին կանգնել է կոտրած տաշտակի առջև` իրականությանը չի համապատասխանում: Տեղեկացնում ենք, որ տեղացած կարկուտի վնասների գույքագրման հանձնաժողովը քաղաքացիներից մինչ այժմ ստացել է 120 դիմում։ 

Դիմումների մեծամասնությունը վերաբերում են բազմաբնակարան շենքերի և անհատական բնակելի տների տանիքների փլուզմանը, բնակարանների հեղեղմանը։ 

Կարկուտը տեղացել է Իջևան քաղաքում և Գանձաքար բնակավայրի մի հատվածում։ Իջևան խոշորացված համայնքի գյուղական բնակավայրերը կարկուտից չեն տուժել։ 

Այգիների տուժելու վերաբերյալ ստացված դիմումները վերաբերում են Իջևան քաղաքում գտնվող տնամերձ փոքր հողակտորներին։ Եթե խոսքը վերաբերում է 19.06.2023թ-ին Իջևանում տեղացած կարկտահարությանը, ապա տարածված տեղեկատվությունը, թե բերքի սպասող գյուղացին կանգնել է կոտրած տաշտակի առջև` իրականությանը չի համապատասխանում»։