ԼՈՒՍԱՆԿԱՐՆԵՐ․ Խախտումների պատճառով կասեցվել է թռչնաֆաբրիկայի արտադրական գործունեությունը

«Գետամեջ» թռչնաֆաբրիկայի արտադրական գործունեությունը կասեցվել է հայտնաբերված խախտումների պատճառով։ Այս մասին հայտնում է ՀՀ սննդամթերքի անվտանգության տեսչական մարմնի մամուլի ծառայությունը։

Տեսչական մարմինը «Հետաքննող լրագրողներ» ՀԿ-ի հետ զուգահեռ նմուշառում է կատարել տեղական արտադրության պաղեցված թռչնամսի մի քանի ապրանքանիշներից և հանձնել լաբորատոր հետազոտության։ Փորձաքննության արդյունքում «Գետամեջ» ապրանքանիշի պաղեցված հավի նմուշներում հայտնաբերվել է սալմոնելա։

ՍԱՏՄ-ն ստուգում է իրականացրել նաև թռչնաֆաբրիկայում և մի շարք խախտումներ հայտնաբերել։

«Արտադրական շինությունների այն հատվածներում, որտեղ իրականացվում է սննդամթերքի արտադրություն, հատակի և պատերի մակերևույթը պատրաստված չի եղել անջրանցիկ, լվացվող, ախտահանվող նյութերից, դռները եղել են անհարթ՝ պատրաստված չեն եղել չներծծող նյութերից»,– հայտնաբերված խախտումները թվարկում է տեսչական մարմինը։

Չեն եղել ապահով առաստաղների և արտադրական շինությունների վերևում գտնվող կառուցվածքները, այսինքն՝ չի կանխարգելվել կեղտի կուտակումը, բորբոսի առաջացումն ու խոնավության խտացումը։

Բացի այդ, սննդամթերքի հետ շփման մեջ գտնվող տեխնոլոգիական սարքավորումները և գույքը պատրաստված չեն եղել այնպիսի նյութերից, որ հնարավոր լինի լվանալ և ախտահանել։ Դրանք նաև բարվոք վիճակում չեն եղել։

Նշվում է, որ ՍԱՏՄ–ն ժամկետ է սահմանել հայտնաբերված խախտումները վերացնելու համար:

[843ebbdd40f123f0aea2cd974fc075b5.jpg]

[0742cdebaf61815f2bfde4ddd9ffd4eb.jpg]

[ae1bc2fe0b59a1ca35f079f18e1b10ba.jpg]