ՏԵՍԱՆՅՈՒԹ․ Փարիզում կրկին խաղաղ չէ․ բախումներ՝ ցուցարարների և իրավապահների միջև
Ֆրանսիայի արհմիություններն այս տարի արդեն 14-րդ անգամ բողոքի ակցիա են անցկացնում՝ պահանջելով չեղարկել կենսաթոշակային փոփոխությունները, որոնց համաձայն` նախատեսվում է երկրում կենսաթոշակային նվազագույն տարիքը 62-ից դարձնել 64։
Փարիզում ցույցերը հիմնականում խաղաղ են անցել, որոշ թաղամասերում իրավապահների և ցուցարարների միջև բախումներ և անկարգություններ են գրանցվել: Ցուցարարները մեքենաներ են այրել, քարեր են նետել ու կռվի բռնվել ոստիկանների հետ։ Իրավապահները կիրառել են արցունքաբեր գազ, եղել են ձերբակալություններ։
ԶԼՄ-ների տվյալով՝ դժվարությունների են բախվել մայրաքաղաքի Օրլի օդանավակայանի ուղևորները, որտեղ չեղարկվել են մի շարք թռիչքներ։
Ակցիայի ընթացքում քաղաքացիների անվտանգությունն ապահովել է շուրջ 4000 իրավապահ: Ցույցեր են տեղի ունեցել նաև Ֆրանսիայի այլ խոշոր քաղաքներում:
