Մենք ունենք նոյեմբերի 9-ի փորձը և նույն սխալները չենք անելու. Սիմոնյան

ԱԺ նախագահ Ալեն Սիմոնյանը լրագրողների հետ ճեպազրույցի ժամանակ անդրադարձել է Բաքու-Ստեփանակերտ երկխոսությանն ու  երաշխավորի ինստիտուտին։

«Կարևոր է, որ խաղաղության պայմանագրից հետո մենք ունենանք երաշխավոր։ Մենք տեսնում ենք, որ ունենք նոյեմբերի 9-ի փաստաթուղթ, որի բոլոր կետերը ինչ-որ չափով խախտված են, այն պետությունը, որը երաշխավոր է հանդիսանում, ոչ բավարար կերպով է արձագանքում։

Մենք պետք է հասնենք, որ որ Ադրբեջանը խոսի Բաքու-Ստեփանակերտ երկխոսության մասին, որովհետև հակառակ պարագայում նույն Ադրբեջանին ձեռնտու իրավիճակ չի ստեղծվի։ Վստահ եմ` Ալիևը ներսում բավականին մեծ խնդիրներ ունի։ Նա արտաքին թշնամի ստեղծելու կարիք ունի, մի պահ սկսեց Իրանի նկատմամբ այդ բառապաշարով խոսել։

Եթե Բաքու-Ստեփանակերտ երկխոսությունը տեղի չունենա, խնդիրը չի լուծվելու, այլ տարբերակը ցեղասպանությունն է, որը իհարկե թույլ չենք տա, որ տեղի ունենա։ Ադրբեջանի իշխանությունները պետք է հասկանան, որ այդ հարցը իրենց համար շատ ավելի կարևոր է, քան  մեր»,- ասել է Սիմոնյանը։

ԱԺ նախագահը նշել է,  որ բոլոր այն կենտրոնները, որտեղ տեղի են ունենում բանակցություններ, պատրաստ են դառնալ երաշխավոր և կարևոր է, որ երաշխավորը հետագայում հետամուտ լինի  պայմանավորվածության պահպանմանը։

«Կարևոր է, որ լինի այնպիսիս երաշխավոր, որը հետամուտ լինի այն պայմանավորածությանը, որը ձեռք կբերվի։ Մենք տեսնում ենք նոյեմբերի 9-ի հայտարարությունը, դրա պահպանումը  անձամբ ինձ չի բավարարում ու վստահ եմ, որ ՀՀ ժողովրդին էլ չի բավարարում մեր գործընկերների հայտարարությունը։

Մենք ունենք նոյեմբերի 9-ի փորձը և նույն սխալները չենք անելու, ես որևիցէ մեկին նկատի չունեմ, երաշխավորման մեխանիզմները ավելի հստակ պետք է ձևակերպված լինեն։ Թե՛ Եվրամիությունը, թե՛ ԱՄՆ-ն , թե՛  ՌԴ-ն պատրաստ են հանդիսանալ խաղաղության պայմանագրի կնքման երաշխավոր, բայց մենք է ընտրենք հնարավորինս պինդ մեխանիզմ»,- նշել է Ալեն Սիմոնյանը։