Եվս մի քայլ առաջ ունեցանք վերահաստատելու 29,800 քառ․ կմ տարածքային ամբողջականությունը․ Փաշինյան

Այսօր կարևոր էր, որ կողմերն ընդգծեցին, որ դեմ չեն Հայաստանի և Ադրբեջանի միջև հետագա սահմանագծման աշխատանքների համար որպես հիմք վերցվեն 1975 թվականի քարտեզները։ Այս մասին Մանուկ Բեյի պալատում Մոլդովայի հայ համայնքի ներկայացուցիչներին հայտնել է վարչապետ Նիկոլ Փաշինյանը՝ խոսելով հնգակողմ հանդիպման արդյունքներից։

«Եվս մի քայլ առաջ ունեցանք վերահաստատելու 29,800 քառ․ կմ տարածքային ամբողջականությունը»։

Նա նաև նշել է, որ հունիսի 12-ին Հայաստանի և Ադրբեջանի ԱԳ նախարարները կհանդիպեն Վաշինգտոնում։ Հունիսի 2-ին տարածաշրջանային կոմունիկացիաների հետ կապված եռակողմ աշխատանքային խմբի հանդիպում է նախատեսված Մոսկվայում։

Նշենք, որ այսօր Մոլդովայի մայրաքաղաք Քիշնևից մոտ 45 կմ հեռավորության վրա գտնվող Բուլբոակա գյուղում կայացել է հնգակողմ հանդիպում` Հայաստանի վարչապետ Նիկոլ Փաշինյանի, Ֆրանսիայի նախագահ Էմանուել Մակրոնի, Գերմանիայի կանցլեր Օլաֆ Շոլցի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի մասնակցությամբ։

Եվրոպական խորհրդի նախագահը հանդիպումից հետո լրագրողներին հայտնել է, որ հուլիսի 21-ին նախատեսվում է ՀՀ վարչապետի, Ադրբեջանի նախագահի և իր մասնակցությամբ եռակողմ հանդիպում Բրյուսելում։

Մինչ այս Հայաստանի և Ադրբեջանի ղեկավարները մայիսի 14-ին բանակցություններ են անցկացրել Բրյուսելում ՝ Միշելի և մայիսի 25-ին Մոսկվայում ՝ Ռուսաստանի նախագահ Վլադիմիր Պուտինի մասնակցությամբ: