ԱՄՆ-ն նոր պատժամիջոցներ կսահմանի ՌԴ-ի դեմ՝ կապված իրանական ԱԹՍ-ների հետ

Չորեքշաբթ՝ մայիսի 31-ին, Միացյալ Նահանգները կհայտարարի Ռուսաստանի դեմ նոր սահմանափակումների մասին, որոնք վերաբերելու են անօդաչու սարքերում օգտագործվող տեխնոլոգիաների արտահանման վերահսկողության խստացմանը։ Այս մասին հայտարարել է ԱՄՆ պետքարտուղար Էնթոնի Բլինքենը։

«Վաղը մենք կհայտարարենք նոր միջոցների մասին, որոնք խստացնում են արտահանման հսկողությունը իրանական անօդաչու թռչող սարքերում հայտնաբերված տեխնոլոգիաների նկատմամբ, որոնք օգտագործվում են ուկրաինացի խաղաղ բնակիչների և քաղաքացիական ենթակառուցվածքների վրա հարձակումների ժամանակ, ինչպես նաև կհակազդենք ռուսական ապատեղեկատվությանը, կաջակցենք իրավապաշտպաններին», - ասել է Բլինքենը մամուլի ասուլիսի ժամանակ։

Մայիսի 15-ին Սպիտակ տունը հայտնել է, որ ամերիկյան նախագահի վարչակազմը համաձայնել է պատժամիջոցներ կիրառել Ռուսաստանի և Իրանի միջև ռազմատեխնիկական համագործակցության մեջ ներգրավվածների դեմ։ Խոսքը հիմնականում Մոսկվային իրանական անօդաչու թռչող սարքերի, ինչպես նաև Ուկրաինայում ռազմական գործողությունների ժամանակ օգտագործված հրետանու և զինամթերքի մատակարարման մասին էր։ Ռուսաստանն ու Իրանը հերքում են այդ մատակարարումների մասին տեղեկությունները։