Հարավային Կորեան Ուկրաինային զինամթերք ուղարկելու պլաններ չունի

Ուկրաինային Սեուլի կողմից ռազմական օգնություն տրամադրելու հարցը կդիտարկվի «տեղում» իրավիճակն ուսումնասիրելուց հետո, հայտարարել է Հարավային Կորեայի նախագահի ազգային անվտանգության հարցերով խորհրդական Չո Տե Յոնգը։ 

«Մինչ այժմ մենք հումանիտար և ֆինանսական օգնություն ենք ցուցաբերել Ուկրաինային: (...) Մենք նախատեսում ենք դիտարկել դա (ռազմական օգնության տրամադրման հնարավորությունը)՝ տեղում իրավիճակը մշտադիտարկելուց և այլ իրավիճակների լույսի ներքո»,- Yonhap-ը մեջբերում է Չո Տե Յոնգի խոսքերը։

Միաժամանակ, ինչպես նշում է գործակալությունը, ազգային անվտանգության հարցերով խորհրդականը հասկացրել է, որ այս պահին Ուկրաինա զինամթերք ուղարկելու պլաններ չկան ո՛չ ուղղակիորեն, ո՛չ Լեհաստանի միջոցով։ 

Նախագահ Յուն Սոկ Յոլն առաջին անգամ այս կիրակի հանդիպել է Ուկրաինայի նախագահ Վլադիմիր Զելենսկու հետ Ճապոնիայի Հիրոսիմա քաղաքում G7-ի գագաթնաժողովի շրջանակում և խոստացել լրացուցիչ օգնություն՝ ներառյալ ականազերծման սարքավորումներ և շտապօգնության մեքենաներ: