ՏԵՍԱՆՅՈՒԹ․ Բելգորոդում դիվերսանտների փոքր խմբերը շարունակում են սահմանից առաջանալ
ՌԴ Բելգորոդի մարզի Գրայվորոն քաղաքային թաղամասում ուկրաինացի դիվերսանտների փոքր խմբերը շարունակում են սահմանից առաջանալ դեպի Կոզինկա բնակավայր: Այս մասին հայտնում է SHOT թելեգրամյան ալիքը: Վերջինիս փոխանցմամբ՝ նրանց դեմ կռվում են ռուս ուժայինները։
Նշվում է, որ Բելգորոդում հրետակոծության հետևանքով 12 մարդ է տուժել։ Այս մասին հայտնել է շրջանի նահանգապետ Վյաչեսլավ Գլադկովը և նշել, որ Ռուսաստանի Դաշնության անվտանգության ուժերը շարունակում են մաքրման աշխատանքները Բելգորոդի մարզի Գրայվորոնի շրջանում, որտեղ ներթափանցել է ուկրաինական դիվերսիոն-հետախուզական խումբ։
«Տարածքի մաքրման աշխատանքները շարունակվում են։ Հոսանքազրկված է 14 բնակավայր, վնասվել է 29 առանձնատուն և երեք մեքենա», - հայտնել է նահանգապետ Վյաչեսլավ Գլադկովը թելեգրամյան իր ալիքում։
Հիշեցնենք՝ ավելի վաղ հայտնել էինք, որ Ուկրաինայի ԶՈՒ դիվերսիոն-հետախուզական խումբը մտել է Բելգորոդի շրջան: Ուկրաինական կողմից հերքում են իրենց մասնակցությունը դիվերսիային: Ռուսաստանից էլ հայտնում են, որ սա արվում է ուշադրությունը Բախմուտից շեղելու համար: Նշենք, որ ռուսական կողմն ավելի վաղ հայտնել էր Բախմուտը վերահսկողության տակ վերցնելու մասին:
