ՄԱԿ-ը չի համապատասխանում ներկայիս իրողություններին. Մոդի
Հնդկաստանի վարչապետ Նարենդրա Մոդին կիրակի կոչ է արել բարեփոխել ՄԱԿ-ը՝ կարծիք հայտնելով, որ անցյալ դարում ստեղծված կազմակերպությունները չեն համապատասխանում աշխարհի «ներկայիս իրողություններին»։ Նման հայտարարություն նա արել է Հիրոսիմայում G7-ի գագաթնաժողովում։
Ըստ PTI-ի զեկույցի՝ Մոդին զարմացել է, թե «ինչու ՄԱԿ-ը, որը սկսել է խաղաղություն հաստատելու գաղափարով, այսօր չի հաջողում հակամարտությունների կանխարգելման գործում»:
«Ինչո՞ւ ՄԱԿ-ը չի ընդունել ահաբեկչության նույնիսկ սահմանումը։ Եթե մտածեք դրա մասին, մի բան պարզ է. Անցյալ դարում ստեղծված կազմակերպությունները չեն համապատասխանում քսանմեկերորդ դարի համակարգին»,- ասել է Մոդին։
Նրա խոսքով՝ ՄԱԿ-ը «չի արտացոլում աշխարհի ներկա իրողությունները»։ «Այդ իսկ պատճառով անհրաժեշտ է, որ բարեփոխումներ իրականացվեն այնպիսի խոշոր կազմակերպություններում, ինչպիսին ՄԱԿ-ն է»,- ասել է Հնդկաստանի վարչապետը։
Ինչպես նշում է գործակալությունը, Հնդկաստանը դիտարկում է ՄԱԿ-ի Անվտանգության խորհրդում մշտական տեղ ստանալու հնարավորությունը։
Այժմ ՄԱԿ-ի Անվտանգության խորհրդի մշտական անդամներն են Ռուսաստանը, Չինաստանը, Մեծ Բրիտանիան, ԱՄՆ-ն և Ֆրանսիան։
ՄԱԿ-ի գլխավոր քարտուղար Անտոնիո Գուտերեշը նաև Հիրոսիմայում կայացած մամուլի ասուլիսում ասել է, որ եկել է ժամանակը բարեփոխելու ինչպես ՄԱԿ-ի Անվտանգության խորհուրդը, այնպես էլ Բրետտոն Վուդսի համակարգը՝ «այսօրվա աշխարհի իրողություններին» համապատասխանելու համար։
«Համաշխարհային ֆինանսական ճարտարապետությունը դարձել է հնացած, անգործունակ և անարդար … Այն չի կարողացել կատարել իր հիմնական գործառույթը՝ որպես համաշխարհային անվտանգության ցանց», - ասել է գլխավոր քարտուղարը:
