Կրտսեր սերժանտ Նարեկ Բաղդասարյանը հետմահու պարգևատրվել է
Մայիսի 12-ին ադրբեջանական սադրանքի հետեւանքով զոհված կրտսեր սերժանտ Նարեկ Բաղդասարյանը հետմահու պարգեւատրվել է։ Այս մասին տեղեկանում ենք ՀՀ նախագահի հրամանագրից:
Նախագահ Վահագն Խաչատուրյանի մայիսի 19-ի հրամանագրում ասվում է․
«Հիմք ընդունելով վարչապետի միջնորդությունը՝ համաձայն Սահմանադրության 136-րդ հոդվածի, ինչպես նաեւ «Հայաստանի Հանրապետության պետական պարգեւների եւ պատվավոր կոչումների մասին» օրենքի 5.3-րդ հոդվածի 1-ին եւ 9-րդ մասերի.
Հայրենիքի սահմանները պաշտպանելիս ցուցաբերած խիզախության եւ անմնացորդ նվիրումի համար Հայաստանի Հանրապետության պաշտպանության նախարարության N զորամասի ժամկետային պարտադիր զինծառայող, կրտսեր սերժանտ Նարեկ Նորայրի ԲԱՂԴԱՍԱՐՅԱՆԻՆ հետմահու պարգեւատրել «Հայրենիքին մատուցած ծառայությունների համար» 2-րդ աստիճանի մեդալով»:
