Իսրայելը վերաբացել է անցակետերը Գազայի հետ սահմանին
Իսրայելը կիրակի օրը վերաբացել է հսկիչ-անցագրային կետերը Գազայի հատվածի հետ սահմանին։ Փոխանցում է tass.ru-ն հղում անելով երկրի պաշտպանության նախարարության մամուլի ծառայությանը։
Դա տեղի է ունեցել պաղեստինյան անկլավում հրադադարից հետո, որտեղ մայիսի 9-ից իսրայելական բանակը իրականացնում է «Վահան և նետ» գործողությունը՝ հարվածելով «Իսլամական ջիհադ» արմատական խմբավորման թիրախներին, որոնք հրթիռներ են արձակել Իսրայելի տարածք։
Իսրայելի պաշտպանության նախարարությունը վերաբացել է Իսրայելի և Գազայի հատվածի սահմանին գտնվող Քերեմ Շալոմ և Էրեզ անցակետերը։
Գազայի արմատականները հինգ օրվա ընթացքում ավելի քան 1200 հրթիռ են արձակել Իսրայելի վրա, ըստ The Times of Israel-ի, իսկ իսրայելական բանակը պատասխան հարված է հասցրել անկլավում գտնվող մոտ 350 թիրախների։
