«ԵՄ դիտորդները չէին էլ կարող որևէ արձագանք տալ»․ ՀՀ ԱԳ փոխնախարար

ՀՀ ԱԳ փոխնախարար Պարույր Հովհաննիսյանն անդրադարձել է ադրբեջանական սադրանքներին ԵՄ դիտորդների արձագանքի բացակայությանը։

Նրա խոսքով, ադրբեջանական սադրանքների վերաբերյալ ԵՄ դիտորդները չէին էլ կարող որևէ արձագանք տալ. «Նրանց դերակատարումն է զեկույցներ պատրաստել Բրյուսելի և ԵՄ անդամ երկրների համար։ Նրանց խնդիրն է պարբերաբար այցելել սահմանի բոլոր հատվածները։ Ես կարող եմ նշել, որ նրանց ներկայությունն արդեն իսկ ներդրում է իրավիճակը բարելավելու գործում։ Դա ստեղծում է հոգեբանական առումով ավելի ապահով մթնոլորտ, և այդ մասով առաքելությունն ամբողջությամբ կատարում է իր մանդատը»։

Հիշեցնենք՝ մայիսի 11–ի ժամը 06:00-ից սկսած Ադրբեջանի ԶՈւ ստորաբաժանումները հրետանային և ականանետային միջոցներից կրակ են բացել Սոթքի մոտ տեղակայված հայկական դիրքերի ուղղությամբ: Հայկական կողմն ունի 4 վիրավոր։