Պակիստանի իշխանություններն անկարգությունների ֆոնին բանակային ստորաբաժանումներ են մտցրել մայրաքաղաք Իսլամաբադ։ Այս մասին նշվում է Իսլամաբադի ոստիկանության թվիթերյան հաղորդագրության մեջ։

«Բանակը մտել է քաղաք։ Ոստիկաններն ու Պակիստանի բանակը մայրաքաղաքում են հասարակական կարգը պահպանելու համար»,- նշվում է  հաղորդագրության մեջ:

Համացանցում տարածվել են կադրեր, որոնցում երևում է իրավիճակը Իսլամաբադում։ Տեսանյութում լսվում են նաև կրակոցներ։

Նշվում է, որ ցուցարարները հրկիզել են ոստիկանական տեղամասերից մեկը, ոստիկանական զրահապատ մեքենան և մասնավոր ավտոմեքենաներ: Ըստ իրավապահների՝ անկարգությունների մասնակիցները կրակ են բացել։

Պակիստանի քաղաքներում բողոքի ցույցերը սկսվել են նախկին վարչապետ, ընդդիմադիր «Թեհրիք ի Ինսաֆ» կուսակցության առաջնորդ Իմրան Խանի ձերբակալությունից հետո: