Իրանում կախաղանի միջոցով մահապատժի է ենթարկվել երկու տղամարդ
Իրանում մահապատժի է ենթարկվել երկու տղամարդ, ովքեր դատապարտվել են «Ղուրանը այրելու» և «Իսլամի մարգարեին վիրավորելու» համար, հայտնել է երկրի դատական իշխանությունը, գրել է BBC-ն։
Յուսեֆ Մեհրադն ու Սադրոլլահ Ֆազելի-Զարեն սոցիալական ցանցերի տասնյակ էջեր են վարել՝ «նվիրված աթեիզմին ու սրբությունները պղծելուն», հաղորդել է դատական իշխանության Mizan գործակալությունը:
Մեհդադի փաստաբանը պնդել էր, որ նա անմեղ է, իսկ դատավճիռը՝ անարդար։ Mizan-ը հայտնել է, որ Յուսեֆ Մեհրադն ու Սադրոլլահ Ֆազելի-Զարեն կախաղան են բարձրացվել երկուշաբթի առավոտյան Իրանի կենտրոնական Արաք բանտում:
Երկու տղամարդիկ ձերբակալվել էին 2020 թվականին և մեղադրվում էին «Սնահավատության ու կրոնի քննադատություն» կոչվող տելեգրամյան ալիքը վարելու համար, ըստ Իրանի իրավապաշտպանների լրատվական գործակալության (HRANA): Համաձայն՝ իրավապաշտպանների՝ նրանք առաջին երկու ամիսների ընթացքում պահվել էին մենախցում՝ զրկվել լինելով փաստաբանից։
2021 թվականին Արաքի քրեական դատարանը Մեհրադին ու Ֆազելի-Զարեին մեղավոր էր ճանաչել սրբապղծության մեղադրանքով, դատապարտել մահապատժի։ Նրանք նաև 6 տարվա ազատազրկման էին դատապարտվել «ազգային անվտանգության դեմ գործող խմբեր ղեկավարելու համար»։
«Գերագույն դատարանը մերժել է նրանց բողոքարկումները դատավճիռների դեմ ու հաստատել նրանց մահապատժի դատավճիռները նույն տարվա վերջին»,- հայտնել է Mizan-ը՝ հավելելով, որ երկուսն էլ «բացահայտորեն խոստովանել են իրենց հանցանքները»:
