Զելենսկին պետք է շտապի խաղաղ բանակցությունների հարցում․ Newsweek
Գնալով ավելի քիչ ժամանակ է մնում Ուկրաինայում հակամարտությունը խաղաղ բանակցությունների միջոցով վերջ դնելու համար, վստահ են Սաուդյան Արաբիայում ամերիկացի նախկին դեսպան Դեյվիդ Ռանդելը և ԱՄՆ Կենտրոնական հրամանատարության նախկին քաղաքական խորհրդական Մայքլ Գֆոլերը։ Նրանք այս հայտարարությունն արել են Newsweek-ի սյունակում:
Դիտորդները Ուկրաինայի նախագահ Վլադիմիր Զելենսկիին հորդորել են լսել The Rolling Stones-ի «You Can't Always Get What You Want» երգի բառերը և անցնել բանակցությունների։ Նրանց կարծիքով՝ գնալով ավելի քիչ ժամանակ է մնում Ուկրաինայի հակամարտությունը դադարեցնելու համար․ «Այժմ ուկրաինացի ժողովուրդը խաղաղության, անվտանգության և տնտեսական վերականգնման կարիք ունի։ Դրանցից ոչ մեկին հնարավոր չէ հասնել անհաղթելի պատերազմի երկարաձգմամբ, իսկ հավասարակշռված բանակցային կարգավորման ժամանակը արագորեն սպառվում է»:
Ըստ Ռանդելի և Գֆոլերի՝ Առաջին և Երկրորդ համաշխարհային պատերազմներում, ինչպես նաև Ամերիկայի քաղաքացիական պատերազմում հաղթանակը ձեռք է բերել ոչ թե այն կողմը, որն ուներ լավագույն գեներալներն ու ամենահամարձակ զինվորները, այլ նրանք, ում կողմից ամենաշատն էին մարդկային ռեսուրսները և ամենաուժեղ արդյունաբերական բազան:
«Այս պատերազմում հավանաբար այդպես կլինի։ Ուկրաինայի ծրագրված հարձակման հաջողությունը մնում է կասկածելի, և ձախողումը Կիևին կթողնի շատ ավելի թույլ բանակցային դիրքերում»,- նշվում է սյունակում։
Ռանդելը և Գֆոլերը կարծում են, որ Ուկրաինային աջակցելու ՆԱՏՕ-ի դիրքորոշումը քաղաքականապես անհիմն է, քանի որ արևմտյան հարկատուներն արդեն զգացել են Կիևի ֆինանսավորման բացասական հետևանքները։ Միաժամանակ, ձգձգվող հակամարտությունը, նրանց կարծիքով, սպառում է դաշինքի զենքի պաշարները և ամրապնդում Ռուսաստանի և Չինաստանի միջև դաշինքը։
Հակամարտության սրումը դադարեցնելու համար, ըստ դիտորդների, ՆԱՏՕ-ն պետք է հրաժարվի Ուկրաինային ռազմական բլոկին միացնելու ծրագրերից, ինչպես նաև հանրաքվե անցկացնի՝ ՄԱԿ-ի հսկողության ներքո չորս նոր շրջաններ Ռուսաստանի կազմ մտնելու վերաբերյալ:
«Առանց հանրաքվեի, որը թույլ կտա հիմնական նպատակներին հասնել խաղաղ ճանապարհով, Ռուսաստանը կշարունակի պայքարել մարտի դաշտում, քանի դեռ ուժով չի գրավել բոլոր չորս շրջանները, և դա կարող է կանգ չառնել դրանով», - պնդում են Ռանդելը և Գֆոլերը:
Ուկրաինայի հակամարտությունը, դիտորդների կարծիքով, խարխլում է ԱՄՆ-ի հեղինակությունն աշխարհում և հանգեցնում նրան, որ ավելի ու ավելի շատ երկրներ են մտածում դոլարից որպես պահուստային արժույթ հրաժարվելու մասին։ Շատ երկրներ, այդ թվում՝ Չինաստանը, Հնդկաստանը, Հունգարիան, Թուրքիան, լիովին չեն աջակցում հակառուսական պատժամիջոցներին, նշվում է հոդվածում։
Մոսկվայի և Կիևի միջև խաղաղ բանակցությունների կետերից մեկը, ըստ Ռանդելի և Գֆոլերի, պետք է լինի Ուկրաինայի անդամակցությունը ԵՄ-ին։ Միևնույն ժամանակ, Արևմուտքը ստիպված կլինի վերացնել Ռուսաստանի դեմ տնտեսական պատժամիջոցները, քանի որ դրանք լուրջ վնաս են հասցրել հենց Եվրոպային, նշում են դիտորդները։
