ԵՄ առաջնորդները պլանավորում են հեռախոսազրույց՝ ԱՄՆ նախագահի հետ
ԵՄ առաջնորդները պլանավորում են այսօր կամ շաբաթվա վերջից առաջ հեռախոսազրույց ունենալ ԱՄՆ նախագահի հետ, պնդում է Բրյուսելի Euractiv պորտալը՝ հղում անելով աղբյուրներին։
«Եվրոպացիների և Թրամփի միջև ևս մեկ վիրտուալ հանդիպում կարող է տեղի ունենալ արդեն երեքշաբթի կամ այս շաբաթվա վերջում», - նշում է պարբերականը։
Ինչպես գրում է Euractiv-ը, չնայած եվրոպացի առաջնորդների այցը ԱՄՆ դրական ավարտ է ունեցել, այն որևէ պարզություն չի բերել հիմնական հարցերի շուրջ՝ ո՛չ կարգավորման, ո՛չ Կիևի համար անվտանգության երաշխիքների ձևաչափի, ո՛չ էլ Ռուսաստանի և Ուկրաինայի միջև բանակցությունների հեռանկարների վերաբերյալ։
Օգոստոսի 19-ին Եվրոպայում տեղի կունենան արտակարգ տեսակոնֆերանսներ «կամավորների կոալիցիայի» և ԵՄ բոլոր երկրների ղեկավարների միջև, որոնց ընթացքում նրանք կմշակեն ընդհանուր դիրքորոշում ուկրաինական հակամարտության կարգավորման հարցի վերաբերյալ։
