ՏԵՍԱՆՅՈՒԹ․ Բժշկական ոլորտի աշխատողները կլիցենզավորվեն․ Ավանեսյան
Հայաստանի կառավարությունն առաջարկում է ներդնել բուժաշխատողների անհատական լիցենզավորման համակարգ։ Առողջապահության նախարար Անահիտ Ավանեսյանը կառավարության նիստում ներկայացրել է «Բնակչության բժշկական օգնության և սպասարկման մասին» օրենքում և հարակից օրենքներում փոփոխությունների նախագծերի փաթեթը։
Նախարարի խոսքով՝ 2001թ․ լիցենզավորման համակարգը կասեցվել է, և վերջին հինգ տարվա ուսումնասիրությունները ցույց են տվել, որ մարդկային ներուժի զարգացման կարիք կա. «Բուժաշխատողներն ու բուժաշխատողների նկատմամբ պահանջներն են, որ պետք է բարձրացնեն առողջապահական ծառայությունների որակը։ Այս օրենքի նախագծով առաջարկում ենք ներդնել լիցենզավորման երկու տիպի ինստիտուտ։ Առաջին՝ անցումային լիցենզավորումը վերաբերվելու է օրդինատուրայում սովորող ուսանողներին։ Սա կարևոր քայլ է՝ նրանց հնարավորություն տալու՝ ուսումնառության ընթացքում ունենալ նաև գործնական և աշխատանքային փորձառություն։ Այժմ այդպիսին են պահանջները կրթական համակարգի նկատմամբ։ Այս անցումային լիցենզիայի շրջանակներում բժշկի հսկողության տակ օրդինատորները և ռեզիդենտները հնարավորություն կունենան մասնագիտական գործունեությամբ զբաղվել, իրենց հմտությունները լավացնել։ Հաջորդը կրթությունն ամբողջովին ստացած մասնագետների լիցենզիան է»,- մանրամասնեց Ավանեսյանը։
Նախարարի խոսքով՝ լիցենզիաները տրվելու են 5 տարի ժամկետով։ Նախատեսված են նաև անցումային դրույթներ, որպեսզի առողջապահական համակարգը նախապատրաստվի նման լայնածավալ բարեփոխումների. «2024թ. հունվարի 1-ից կսկսվի անհատական լիցենզիաների տրամադրումն օրդինատորների համար, այնուհետ 2026թ. հունվարի 1-ից համակարգն ամբողջությամբ կսկսի գործել»։
Ըստ Ավանեսյանի՝ լիցենզավորումն իրականացվելու է քննական ձևով. «Տրամադրվելու է որոշակի հմտությունների ստուգման պարագայում և հինգ տարի հետո շարունակվելու է, եթե կասեցման հիմքեր չկան»։
Նախարարը մանրամասնեց, որ լիցենզիայի կասեցման հիմք կարող են հանդիսանալ բժշկական սխալը, էթիկայի նորմերի խախտումները, հավաստագրման պահանջները չիրականացնելը։
