Ուկրաինայի զինված ուժերը Բախմուտում հակահարձակման են անցել՝ կարողանալով վերադարձնել նախկինում կորցրած մի շարք դիրքեր։ Այդ մասին հայտնում է Ուկրաինայի տարածքային պաշտպանության ուժերի Military Media Center հարթակը՝ հղում անելով Ուկրաինայի զորքերի արևելյան խմբավորման հրամանատար Ալեքսանդր Սիրսկուն։

«Առաջ շարժվելու համար թշնամին կիրառում է առավելագույն ջանքեր և ոչինչ հաշվի չի առնում։ Չնայած էական կորուստներին, մարտի պարբերաբար նետվում են Վագների նոր գրոհիչ խմբեր, մասնավոր մյուս ընկերությունների մարտիկներ, դեսանտայիններ։ Սակայն քաղաքը իր վերահսկողության տակ վերցնել թշնամուն չի հաջողվում»,- ասել է Սիրսկին։

Ըստ ուկրաինացի զինվորականի՝ Բախմուտում իրավիճակը բավականին բարդ է։ Սիրսկին նշում է, որ Բախմուտի ուղղությամբ շարունակվում են ինտենսիվ մարտական գործողությունները։ 

Բացի դա, նա նշել է, որ ուկրաինական ուժերը Լիմանի ուղղությամբ կարողացել են հետ մղել ռուսական հարձակումները և գերեվարել ռուսաստանցի 10 զինծառայողի։