Ուկրաինան երեք նոր պայմանագիր է կնքել թուրքական Baykar ընկերության հետ, հայտնում է Interfax-Ukraine-ը՝ վկայակոչելով երկրի ռազմավարական արդյունաբերության նախարար Ալեքսանդր Կամիշինին։

Հաղորդվում է, որ պայմանավորվածությունները ձեռք են բերվել Ստամբուլում ավիացիոն տեխնիկայի Teknofest 2023 միջազգային ցուցահանդեսին մասնակցելու արդյունքներով։ Կամիշինը չի հայտնել համաձայնագրի մանրամասները։ Միևնույն ժամանակ նա հավելել է, որ նոր պայմանագրերն Ուկրաինային ապահովում են «արտահանման եկամուտներ և նոր սերնդի զենքեր»։ 

Հիշեցնենք, որ 2018 թվականին Ուկրաինան պայմանագիր է կնքել Թուրքիայի հետ Baykar-ի կողմից արտադրված Bayraktar TB2 վեց անօդաչու թռչող սարքերի գնման համար։ 2022-ին հայտնի դարձավ, որ Ուկրաինան նախատեսում է  Baykar-ից գնել տասնյակ հարվածային անօդաչու թռչող սարքեր, ինչպես նաև ուկրաինական տարածքում կառուցել այս տեսակի անօդաչու թռչող սարքերի արտադրության գործարան։