ՏԵՍԱՆՅՈՒԹ․ Վեճ է ծագել զոհված զինծառայողների ծնողների և ոստիկանների միջև
Վեճ է ծագել Երևանում բողոքի ակցիա անցկացնող զոհված զինծառայողների ծնողների և ոստիկանների միջև։ Այս մասին հայտնում է armeniasputnik.am-ը։
Ծնողները Հյուսիսային պողոտայի Քայլող մարդու քանդակի վրա պետական պաշտոնյաների լուսանկարնե էին կախել, ոստիկանները փորձում էին կանխել դա։
Զոհված զինծառայողների ծնողներն ու հարազատները մի խումբ հասարակական ու քաղաքական գործիչների հետ բողոքի ակցիա են իրականացնում ՀՀ ԱԺ շենքի մոտ։
Ծնողների ակցիային է միացել «Անվտանգություն և ժողովրդավարություն» ՀԿ նախագահ Նաիրա Զոհրաբյանը, ՍԴ աշխատակազմի նախկին ղեկավար Էդգար Ղազարյանը, Արցախի նախկին ՄԻՊ, իրավապաշտպան Ռուբեն Մելիքյանը։
Նրանք հայտնում են, որ այս ակցիան ընդդեմ «Քաղաքացու օրվա» է ու անվանում են այն «Սպանված քաղաքացու օր»։
«Նիկոլին (ՀՀ վարչապետ Նիկոլ Փաշինյանին,–խմբ.) հանենք, որ էլ զոհ չունենանք, որ էլ մարդ չմահանա, որ երկիրն այլևս խայտառակ չլինի»,– ասել է ակցիայի մասնակիցներից մեկը։
Նա նշեց` ինքն այժմ Երևանում է ապրում, որովհետև Արցախի Քարվաճառում գտնվող իր տունն այլևս չկա։
Ակցիայի մասնակիցները ԱԺ–ի մոտից քայլերթով անցան Բաղրամյան պողատան ու հասնելով Հյուսիսային պողոտա` «Քայլող մարդը» արձանի վրա փակցրին գործող իշխանության ներկայացուցիչների, ՀՀ վարչապետ Նիկոլ Փաշինյանի, նրա տիկնոջ` Աննա Հակոբյանի, ՀՀ պաշտպանության նախկին նախարար Դավիթ Տոնոյանի, ՀՀ ՊԲ նախկին հրամանատար Ջալալ Հարությունյանի նկարները` ասելով, թե նրանք են բոլոր չարիքների մեղավորը։
