ՏԵՍԱՆՅՈՒԹ․ Երկրորդ և երրորդ նախագահները լավ ադրբեջաներեն էին խոսում Ադրբեջանի նախագահի հետ․ Սուքիասյան

«Քաղաքացիական պայմանագիր» խմբակցության պատգամավոր Խաչատուր Սուքիասյանը ԱԺ-ում իր ելույթի ժամանակ անդրադարձավ ընդդիմության կողմից հնչող քննադատություններին՝ ուղղված գործող իշխանությանը:

«Մեղադրում եք մեր սահմանափակ հնարավորություն ունեցող պետությանը, ի՞նչ պետք է աներ, որ չի կարողացել անել։ Կրթելու ենք մեր հասարակությանը, ունենալու ենք ինստիտուցիոնալ պետություն, որ բոլոր կառույցները աշխատեն, ձեր տոկոսը նվազելու է։ Քննադատում եք մեզ, ես էլ հարցնում եմ՝ երկրորդ և երրորդ նախագահները լավ ադրբեջաներեն էին խոսում Ադրբեջանի նախագահի հետ, կարող ենք իմանալ՝ ի՞նչ էին խոսում»,- ասաց նա։ 

Ըստ պատգամավորի՝ 90-ական թվականներից տեղեկացված է եղել ամեն ինչի մասին, թե գերտերություններից որն ինչ է ուզել, երբ է ակտիվացել. «Բոլորս լավ գիտենք։ Զենք ենք ուզում՝ չեն տալիս, բայց կտան, երբ պետք է։ Մեկն ասում է՝ դիրքերից իջի, որ քեզ լավ խփենք, էն մեկն էլ ԱԹՍ-ների հարցն է չգիտեմ՝ ինչ անում»։ 

Սուքիասյանի խոսքով՝ պետությունը պետք է հզորացնել տնտեսությունից՝ բարձրացնելով նաև ծնելիությունը:

«Ասում եք՝ ազգային կուսակցություն եք, մի օր եղա՞վ, որ ժողովրդին ասեք՝ մի երեխա ավելին ունենան։ Էդ որ ասում ենք՝ տնտեսություն, նշանակում է՝ բանակ, կրթություն, առողջապահություն, ծնելիություն։ Փող պետք է ունենաս, որ էդ ընտանիքը պահես։ Եկեք փոխենք մեր հարաբերվելու ձևը, հարգենք։ Ասել ենք՝ ժողովրդավարություն, ուզում եք ասեք՝ «խառոշի» տղերք եք, պետք է ժողովրդավարության ժամանակ լռենք, բայց էնպես չէ, որ ձեր ասածները հասարակությունը պետք է ընդունի»,- ընդգեց իշխող ուժի անդամը:

Վերջինս նաև նշեց՝ 90-ականների մեր հաղթանակն էլ է պայմանավորված եղել այլ երկրների հետ, ներկայիս պարտությունն էլ: