Շվեդիան սկսում է վերջին քառորդ դարի ամենամեծ զորավարժությունները

Ապրիլի 17-ին Շվեդիայում մեկնարկել են վերջին ավելի քան 25 տարվա ամենախոշոր զորավարժությունները, որին, շվեդ զինվորականներից բացի, մասնակցում են նաև ԱՄՆ-ն և 12 այլ երկրներ, հայտնում են արևմտյան լրատվամիջոցները։ 

«Զորավարժություններն անցկացվում են օդում, ցամաքում և ծովում՝ երկրի տարածքի զգալի հատվածում»,- նշվում է Շվեդիայի զինված ուժերի հաղորդագրության մեջ։ 

Զորավարժություններին մասնակցում են Մեծ Բրիտանիան, Ֆինլանդիան, Լեհաստանը, Նորվեգիան, Էստոնիան, Լատվիան, Լիտվան, Ուկրաինան, Դանիան, Ավստրիան, Գերմանիան և Ֆրանսիան։ Հիմնական միջոցառումներն անցկացվում են երկրի հյուսիսում և հարավում, ինչպես նաև Գոտլանդ կղզու շրջանում։ Զորավարժությունները պետք է շարունակվեն մինչև մայիսի 11-ը, և դրանցում կներգրավվի 26000 զինծառայող։ 

Շվեդիան և Ֆինլանդիան ՆԱՏՕ-ին անդամակցելու հայտ են ներկայացրել 2022 թվականին։ Թուրքիան, լինելով ՆԱՏՕ-ի անդամ, դրեց մի շարք պայմաններ, որոնք պետք է կատարեին երկու սկանդինավյան երկրները, որպեսզի Անկարան վավերացներ իրենց մուտքը դաշինք։ Այնուհետ Թուրքիան հայտարարեց, որ Շվեդիան ամբողջությամբ չի կատարել այս պայմանները։ Շվեդիայի՝ ՆԱՏՕ-ին անդամակցելու շուրջ բանակցությունները սառեցվեցին։ Ֆինլանդիան պաշտոնապես միացավ դաշինքին ապրիլի 4-ին։