«Մենք դա Հայաստանին չենք պարտադրում». Բլինկենը` խաղաղության պայմանագրի մասին
ԱՄՆ պետքարտուղար Էնթոնի Բլինկենը կարծում է, որ Ադրբեջանն ու Հայաստանը շուտով կարող են խաղաղ պայմանավորվածություններ ձեռք բերել: Այդ մասին նա հայտարարել է մարտի 22-ին ելույթ ունենալով ԱՄՆ Կոնգրեսի Սենատի արտաքին գործերի կոմիտեի լսումների ժամանակ։
«Կարծում եմ, որ կա բարենպաստ հնարավորություն, չեմ ուզում դա չափազանցնել, բայց բարենպաստ հնարավորություն, որը թույլ է տալիս իրականում ավարտել խաղաղության համաձայնագրի նախապատրաստումը», - հայտարարել է ԱՄՆ արտաքին քաղաքական գերատեսչության ղեկավարը ՝ մեկնաբանելով Բաքվի և Երևանի միջև կարգավորմանը նպաստելու Վաշինգտոնի փորձերը:
«Ես Մյունխենում հանդիպել եմ (այս տարվա սկզբին) վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ անվտանգության հարցերով խորհրդաժողովում։ Հայաստանի և Ադրբեջանի արտաքին գործերի նախարարները վերջերս գտնվում էին Վաշինգտոնում։ Ակնկալում եմ, որ նրանք կվերադառնան։ Մենք աշխատել ենք (պայմանավորվածության) տեքստի վրա», - ասել է Բլինքենը։
Ըստ ամերիկյան դիվանագիտության ղեկավարի, ինքն ակտիվորեն զբաղվում է Ադրբեջանի և Հայաստանի միջև կարգավորման հարցով, աջակցելով, որ կողմերը «հասնեն խաղաղության համաձայնագրի, որը կկարգավորի Բաքվի և Երևանի հարաբերությունները», ինչպես նաև կվերաբերի «Լեռնային Ղարաբաղում էթնիկ հայերի իրավունքներին և պաշտպանությանը», սահմանազատմանը և այլ հարցերի:
Բլինկենը ՀՀ–ին և Ադրբեջանին առաջարկել է ԱՄՆ օգնությունը խաղաղության շուրջ քննարկումներում
«Մենք դա Հայաստանին չենք պարտադրում։ Մենք պատասխանում ենք Հայաստանի արտահայտած ուժեղ ցանկությանը, որը ցանկանում էր տեսնել, թե արդյոք մենք կարող ենք օգնել հասնել համաձայնության, որը գոնե շատ առումներով վերջ կդներ ավելի քան 30 տարի տևողությամբ հակամարտությանը», - հայտարարել է Բլինկենը։
Ընդ որում, նա հիշատակել է «Լաչինի միջանցքի իրական խնդիրները»։
«Ես ճնշում եմ գործադրում Ադրբեջանի վրա, այդ թվում ՝ այս շաբաթ, որպեսզի այդ միջանցքը կրկին բացվի։ Մենք աշխատում ենք այդ ուղղությամբ», - նշել Է պետքարտուղարը։
Նա հավելել է, որ այժմ բարենպաստ հանգամանքներ կան, որոնք «խորապես կհամապատասխանեն Հայաստանի, ինչպես նաև Ադրբեջանի շահերին»։
Հիշեցնենք, որ 2021 թվականին Ադրբեջանի նախագահ Իլհամ Ալիևը հայտարարել էր Հայաստանի հետ խաղաղության պայմանագիր ստորագրելու պատրաստակամության մասին։ 2022 թվականի մարտին Բաքուն Երևանին էր փոխանցել հարաբերությունների կարգավորման վերաբերյալ հինգ կետից բաղկացած իր առաջարկը: Հայկական կողմը շտկումներ է ավելացրել և ուղարկել իր տարբերակը։ Այդ ժամանակից ի վեր կողմերի միջև տարբեր մակարդակներով բանակցությունների մի քանի փուլ է եղել։
